Azərbaycan İsraildən "Barak MX" RƏM sistemi alıb - KİV

Bakı/15.09.23/Turan: İsrael Aerospace İndustries (İAİ) şirkəti Barak MX RƏM sistemini uğurla sınaqdan keçirib. Şirkət sınağın hansı ölkədə keçirildiyini açıqlamayıb, lakin bunun bu günlərdə HHM təlimləri keçirilən Azərbaycanda olduğu təxmin edilir. Bu barədə sentyabrın 14-də İsrailin Globes nəşri məlumat yayıb.

Operativ təlimlərə döyüş atışı və ballitik raketin tutulması da daxil idi.

Azərbaycan Müdafiə Nazirliyinin məlumatına görə, bu, ölkənin HHM sistemini təkmilləşdirmək məqsədi daşıyan planlaşdırılan təlim idi. Barak MX-nin nümayişini Tehrana mesaj kimi təfsir etmək olar, deyə Globes yazır.

Barak MX təyyarələr, helikopterlər, dronlar və raketlər də daxil olmaqla, geniş spektr hava vasitələrindən etibarlı müdafiəni təmin edən sistemdir. Sistemin gündüz və gecə və istənilən hava şəraitində işləyə bilən dəniz və yerüstü versiyaları var. Sistem 35 km-dən 150 km-ə qədər məsafədə, eyni zamanda bir neçə hədəfi tuta bilər.

Globes hesab edir ki, bu sistem Azərbaycan ərazisini İran tərəfindən raket təhlükəsindən müdafiə edə bilər.

Qeyd edək ki, sentyabrın 13-də Azərbaycan HHM qüvvələrinin təlimi keçirilib. Təlimin videogörüntülərində adları açıqlanmayan RƏM sistemlərinin buraxılması əksini tapıb.

Bundan bir müddət əvvəl Azərbaycandan İsrailə bir neçə hərbi aviasiya uçuşlarının həyata keçirildiyi bildirilmişdi.

Azərbaycan SQ-nin silahları arasında artıq İsrailin "Dəmir günbəz" RƏM sitemi var. 02D