Azərbaycan Sabit İnkişaf Hədəflərinin yerinə yetirilməsi haqqında məruzə təqdim edəcək

Nyu-York/10.07.17/Turan: Nyu-Yorkda BMT-nin qərargah-mənzilində sabit inkişaf üzrə yüksək səviyyəli Siyasi Forum işinə başlayıb. Forum iştirakçıları yoxsulluq və aclığın aradan qaldırılmasına, sağlamlığın yaxşılaşdırılmasına və əhalinin rifahının artırılmasına, gender bərabərliyinin təmin edilməsinə, sənayeləşmənin təşviqinə, dənizlərin qorunmasına və tərəfdaşlığın inkişafına yönəlmiş vəzifələrin həyata keçirilməsinin nəticələrini qiymətləndirəcək.

BMT-nin mətbuat mərkəzinin məlumatına görə, 2030-cu ilə qədər 17 Sabit İnkişaf Hədəfi 2015-ci ildə BMT-yə üzv 193 dövlət tərəfindən yekdilliklə qəbul edilib. Bu sənəddə dünya liderləri "yoxsulluğun və aclığın bütün formalarına və təzahürlərinə son qoymağı və bütün insanların sağlam ətraf mühitdə yaşaya və ləyaqət və bərabərlik şəraitində öz potensiallarını həyata keçirə bilməsinə nail olmağı" vəd ediblər.

BMT Baş Katibinin məruzəsinə əsasən, son 10 ildə bir milyarddan çox insan yoxsulluqdan çıxa bilib. Amma təxminən 760 milyon nəfər hələ də yoxsulluq həddinin altında - gündəlik 1,9 ABŞ dolları ilə yaşayır.

Bu Forumda iyulun 17-dən 19-na qədər 44 dövlət Sabit İnkişaf Hədəflərinin yerinə yetirilməsi haqqında könüllü milli icmalları təqdim edəcəklər. Onlar arasında Azərbaycan, Belarus və Tacikistan da var. -02D-