Azərbaycan səfiri İran XİN-ə çağırılıb

İran XİN şənbə günü Bakıda Cənubi Azərbaycan tərəfdarlarının keçirdiyi tədbirlə bağlı Azərbaycan səfirinə narazılığını bildirib. 

İran mətbuatının məlumatına görə, bazar günü Azərbaycanın İrandakı səfirinə etiraz notası təqdim olunub. İranın  xarici işlər nazirinin müavini Seyed Abbas Arakçı Azərbaycan hakimiyyətinin bu cür tədbirin keçirilməsinin qarşısını almaq iqtidarında olmaması ilə bağlı” səfir Cavanşir Axundova ciddi narazılığını bildirib. 

“İran hər zaman iki ölkə arasında münasibətlərin dərinləşməsinə çalışsa da, bu cür hərəkətlər ikitərəfli əlaqələri pozur”, - nazir müavini vurğulayıb. 

Arakçı tədbirdə İran əleyhinə səslənən fikirlərdən və “sifarişli nəşrlər”in paylanmasından narazılığını bildirib.

Nazir müavini Cənubi Azərbaycan tərəfdarlarının İranda təqib olunması haqda sənədli filmi “təxribat” adlandırıb. Onun sözlərinə görə, belə filmlər yalnız “İsrail dairələri”nin maraqlarına xidmət edir.

“Bu film iki ölkə arasında dost münasibətlərə dair sazişi pozur və tamamilə qəbuledilməzdir”, - Arakçı bildirib.

Xatırladaq ki, Bakıda iranlı mühacirlərin, həmçinin Azərbaycan siyasi xadimlərinin iştirakı ilə keçirilən konfransda Cənubi Azərbaycanın müstəqilliyi uğrunda hərəkatın dövlət səviyyəsində dəstəklənməsinin, bu məsələyə beynəlxalq təşkilatların cəlb edilməsinin vacibliyi vurğulanıb.

Qeyd edək ki, ötən həftə Dağlıq Qarabağda “Talış radiosu” fəaliyyətə başlayıb. Əldə olunan məlumatlara görə, orada iranlılar çalışırlar. Konfransın keçirilməsi iranlıların Azərbaycan əleyhinə aksiyasına cavab olub.-02V-