Azərbaycan, Türkiyə və Gürcüstan XİN rəhbərləri İstanbul bəyannaməsini qəbul ediblər

Bakı/29.10.18/Turan: Bu gün Azərbaycan, Türkiyə və Gürcüstan xarici işlər nazirləri Elmar Məmmədyarov, Mövlut Çavuşoğlu və David Zalkalianinin üçtərəfli görüşü İstanbul bəyannaməsinin imzalanması ilə başa çatıb.

Sənəddə tərəflər dövlətlərin suverenliyi, ərazi bütövlüyü və beynəlxalq səviyyədə tanınmış sərhədlərinin toxunulmazlığına qarşılıqlı hörmət və qəti dəstəyi bir daha bəyan ediblər və bu xüsusda fiziki və hüquqi şəxslərin fəaliyyətlərinin bu prinsiplərlə uyğun olmasını razılaşdırıblar.

Nazirlər Cənubi Qafqaz regionundakı mövcud münaqişələrin sülhü, təhlükəsizliyi, sabitliyi və iqtisadi inkişafı təhlükə altına aldığını, bu səbəbdən status kvonun davamlı olmadığını və qəbuledilməzliyini və yubadılmadan sülh yolu ilə həll tələb etdiyini vurğulayıblar.

Görüş iştirakçıları Dağlıq Qarabağ bölgəsi və ətraf rayonlarında münaqişənin və Gürcüstanın Abxaziya və Tsxinvalı/Cənubi Osetiya regionlarında münaqişələrin davamlı sülh yolu ilə universal formada tanınmış beynəlxalq hüququn norma və prinsipləri, xüsusilə dövlətlərin suverenliyi, ərazi bütövlüyü və beynəlxalq səviyyədə tanınmış sərhədlərinin toxunulmazlığı prinsipləri əsasında, həmçinin BMT, ATƏT və Avropa Şurasının müvafiq qətnamələri, bəyanatları və qərarlarına uyğun olaraq həllinə nail olmağın əhəmiyyətini vurğulayıblar, bütün qaçqın və məcburi köçkünlərin doğma yurd-yuvalarına təhlükəsiz və ləyaqətli qayıdışının zəruriliyini bildiriblər.

Nazirlər müdafiə sənayesi üzrə əməkdaşlıq, üçtərəfli təlimlər, çalışmalar və yüksək səviyyəli görüşləri vurğulayaraq müdafiə sahəsində üçtərəfli əməkdaşlığın vacibliyini qeyd ediblər. Terrorçuluq, zorakı ekstremizm və separatçılığın bütün forma və təzahürlərinin, transmilli mütəşəkkil cinayətkarlıq, narkotik maddələr və prekursorlarının qanunsuz dövriyyəsi, qeyri-qanuni silah ticarəti, insan alveri, miqrant qaçaqmalçılığı, çirkli pulların yuyulması, mədəni və tarixi irsə qarşı cinayətlər, və digər transmilli təhdidlərə qarşı mübarizədə müvafiq beynəlxalq alətlər əsasında əməkdaşlığın gücləndirilməsinə qəti sadiqliklərini bir daha bəyan ediblər.

Nazirlər Türkiyədə 15 iyul 2016-cı il tarixli uğursuz çeviriliş cəhdinin törədicilərinin fəaliyyətini bir daha qınayıblar, hər iki ölkə Türkiyə ilə sıx əməkdaşlığını qeyd edib və Türkiyənin demokratik yolla seçilmiş prezident və hökumətinə qətiyyətli dəstəyini bir daha bəyan ediblər;

Azərbaycanda Ümumdünya EXPO 2025 sərgisinə ev sahibliyi edilməsi üçün Bakı şəhərinin namizədliyinə dəstəyi bir daha vurğulanıb.

Bundan əlavə, enerji sahəsində strateji tərəfdaşlıq vurğulanıblar və "Cənub" qaz dəhlizinin həmçinin Xəzər regionundan Avropaya karbohidrogen ehtiyatlarının nəqlinə yönəlmiş digər enerji layihələrinə tam dəstək bir daha təsdiqlənib.

Nazirlər üç ölkənin müvafiq təşkilatları arasında mətbuat və informasiya sahəsində əməkdaşlığı təşviq ediblər, ölkələr arasında üçtərəfli qardaşlaşmış şəhər mexanizminin təsis olunması ideyasını təsdiq ediblər.

Növbəti üçtərəfli görüş Gürcüstanda keçiriləcək. 06D--