Azərbaycan, Türkiyə və Gürcüstan XİN rəhbərlərinin üçtərəfli görüşünün yekunları haqda

İstanbul/29.10.18/Turan: Türkiyə Azərbaycan və Gürcüstanın ərazi bütövlüyünü bütün platformalarda və istənilən şəraitdə dəstəkləyir. Bu barədə Türkiyənin xarici işlər naziri Mövlud Çavuşoğlu bzar ertəsi İstanbulda azərbaycanlı və gürcüstanlı həmkarı Elmar Məmmədyarov və David Zalkaliani ilə birgə mətbuat konfransında bildirib

Onun sözlərinə görə, XİN rəhbərlərinin üçtərəfli görüşündə Türkiyə, Azərbaycan və Gürcüstan arasında əməkdaşlıq müzakirə olunub.

Tərəflər Türkiyə, Azərbaycan və Gürcüstan liderlərinin qəbul etdikləri qərarların uğurla reallaşmasından, həmçinin energetika, nəqliyyat, əmək, müdafiə və digər qurumların üçtərəfli formatda işindən razı olduqlarını ifadə ediblər.

XİN rəhbəri xatırladıb ki, bundan öncə Bakıda Transanadolu qaz kəmərinin (TANAP) işə salınması mərasimi keçirilib. Tədbirdə Türkiyə, Azərbaycan və Gürcüstan nümayəndələri iştirak ediblər.

"Transanadolu (TANAP) və Transadriatik (TAP) qaz kəmərlərinin işə salınması ilə regiondan qaz Avropa ölkələrinə nəql ediləcək. Bakı-Tbilisi-Qars dəmir yolunun işə salınması da üç ölkə arasında ticarətin inkişafına xidmət göstərib", - M.Çavuşoğlu bildirib.

Nazir qeyd edib ki, Türkiyə Gürcüstanın Avroatlantik qurumlara inteqrasiyasını dəstəkləyir. Onun fikrincə, Türkiyə Gürcüstanın NATO-ya interasiyasına böyük dəstək verir.

O bildirib ki, Türkiyə Azərbaycanı bütün platformmlarda dəstəkləyir: "Ümid edirəm ki, Bakı ümumdünya EXPO-2025 sərgisinin keçirilməsi hüququnu əldə edəcək", - M.Çavuşoğlu vurğulayıb.-02D-