Azərbaycan, Türkiyə və Pakistan müdafiə və təhlükəsizlik sahələrində fəal əməkdaşlıq etmək niyyətindədir

Bakı/30.11.17/Turan: Bu gün Azərbaycan, Türkiyə və Pakistan XİN rəhbərlərinin üçtərəfli görüşü Bakı bəyannaməsinin imzalanması ilə başa çatıb.

Sənəddə üç ölkənin xarici işlər nazirləri Elmar Məmmədyarov, Mövlud Çavuşoğlu və Havaca Məhəmməd Asif dövlətlərin müstəqilliyi, suverenliyi, ərazi bütövlüyü və beynəlxalq səviyyədə tanınmış sərhədlərinin toxunulmazlığı prinsiplərinə qarşılıqlı hörmət və qəti dəstəyi bir daha bəyan ediblər.

Nazirlər yerləşdikləri regionlarda münaqişələrin davam etməsinin təəssüf doğurduğunu bildiriblər.

Onlar mülki şəxslərin zərər görməsi və ərazi bütövlüyünə qarşı gücdən istifadə edilməsini qınayıblar.

Bəyannamədə qeyd olunur ki, bu münaqişələr sülh, sabitlik və iqtisadi inkişafa mane olur. Bununla əlaqədar beynəlxalq hüququn prinsipləri və BMT Təhlükəsizlik Şurasının müvafiq qətnamələri əsasında siyasi yolla həllə çağırış səslənir.

Azərbaycan, Türkiyə və Pakistanın xarici işlər nazirləri müdafiə və təhlükəsizlik sahəsində fəal əməkdaşlığı inkişaf etdirməyə hazır olduqlarını bəyan ediblər.

XİN rəhbərləri terrorizm, ekstremizm və separatizmin bütün forma və təzahürlərinin, transmilli mütəşəkkil cinayətkarlıq, narkotik maddələr və prekursorlarının qeyri-qanuni istehsalı və alveri, qeyri-qanuni silah ticarəti, insan alveri, miqrant qaçaqmalçılığı və qeyri-qanuni miqrasiya, mədəni və tarixi irsə qarşı cinayətlər, çirkli pulların yuyulması, kibercinayətlər və digər transmilli təhlükəsizlik təhdidlərinə qarşı mübarizədə əməkdaşlığın gücləndirilməsinə sadiq olduqlarını bir daha bəyan ediblər.

Tərəflər mədəniyyət, təhsil, səhiyyə, turizm, gənclər, idman və digər sahələrdə əlaqələri inkişaf etdirməyə hazır olduqlarını bildiriblər.-06D--