Azərbaycan və Aİ arasında saziş imzalanacaq - ekspert

Bakı/08.04.19/Turan: Xarici işlər naziri Elmar Məmmədyarovun Avropa İttifaqı ilə sazişin 90% hazır olduğu və onun tezliklə imzalanacağı haqqında bəyanatı maraq doğurub, belə ki, son zamanlara qədər Azərbaycan Aİ-yə qarşı biganəlik, vaxtaşırı isə açıq-aşkar mənfi münasibət nümayiş etdirirdi.

Əhval-ruhiyyənin gözlənilmədən dəyişməsini Turan-a şərh edən Humanitar Araşdırmalar Cəmiyyətinin rəhbəri Əvəz Həsənov xatırladıb ki, Bakının "Assosiasiya sazişindən" imtina etməsindən sonra Azərbaycanın Avropa İttifaqı ilə danışıqları uzun müddətdir davam edir. Bakı alternativ kimi "strateji tərəfdaşlıq" adlı sənəd təklif edib. Bu sənədin müzakirələri gedərkən Ermənistan bənzər bir sənəd imzalayıb və indi yalnız Azərbaycanın və Belarusun Aİ ilə siyasi aspektləri ehtiva edən əməkdaşlıq sənədi yoxdur.

Azərbaycan "Şərq Tərəfdaşlığı" proqramına qoşularkən Bakı Aİ ilə "Enerji təhlükəsizliyi haqqında" ayrıca sənəd imzalayıb və digər istiqamətlərdə əməkdaşlığa tələsməyib. Amma vəziyyət dəyişib, Brüsselin Bakını insan hüquqlarının və demokratik normaların pozulmasına görə tənqid etməsinə baxmayaraq, Aİ ilə əməkdaşlıq Azərbaycan üçün mühüm amilə çevrilib, Həsənov belə hesab edir.

İslahatlara yol açan Azərbaycan Avropanın tənqidini istənilən yolla azaltmağa çalışır. Hökumət danışıqları intensivləşdirib və Avropa Parlamentində seçkilərə qədər onun imzalanmasına və təsdiqinə nail olmaq doğru olardı, ekspert belə hesab edir.

"Ölkə daxilində ciddi əngəl var. İslahatlara mane olan köhnə məmurların vəzifələrdən kənarlaşdırılması mümkündür. Xarici maneələr qaçılmazdır, çünki sıx Azərbaycan-Avropa münasibətləri Rusiyanı qəzəbləndirir. O, Azərbaycan cəmiyyəti daxilində gərginlik yarada, etirazlar dalğasını qamçılaya bilər. Amma, mənə elə gəlir ki, İ.Əliyev Rusiyanı zərərsizləşdirə bilir və buna ona görə nail ola bilər ki, bizim əsas iqtisadi tərəfdaşımız Avropadır. Azərbaycan layihələri Rusiyanın energetika hegemonluğundan çıxmaq istəyən Avropaya ən yaxşı dəstək olaraq qalır.

Gələcək sənəd Aİ-nin Ermənistanla imzaladığı sənədə bənzər olacaq, bəlkə də bizim halda enerji təhlükəsizliyinə daha çox yer ayrılacaq", deyə Həsənov bildirib.

Belə bir sənəd imzalandıqdan sonra Azərbaycanın Avropa və Rusiya arasında xarici siyasət kursu seçimi haqqında müzakirələrə son qoyulacaq. Saziş hakimiyyətin siyasi islahatlar həyata keçirməsinə imkan verəcək, Əvəz Həsənov belə hesab edir. -0-