Azərbaycan və Ermənistan prezidentləri oktyabrın 16-da Cenevrədə görüşəcəklər (YENİLƏNİB)

Bakı/13.10.17/Turan: Azərbaycan və Ermənistan prezidentlərinin görüşü oktyabrın 16-da Cenevrədə olacaq. "ATƏT-in Minsk Qrupu həmsədrlərinin təklifi əsasında Ermənistan-Azərbaycan Dağlıq Qarabağ münaqişəsinin həlli prosesini müzakirə etmək üçün Azərbaycan və Ermənistan prezidentləri 2017-cı il oktyabrın 16-da Cenevrədə görüşəcəklər", - Azərbaycan XİN mətbuat xidmətinin məlumatında bildirilir.-06D--

* * *

2017 Oktyab 13 (Cümə) 13:02:18

İlham Əliyevlə Serj Sarkisyan Cenevrədə görüşəcəklər?

Bakı/13.10.17/Turan: Gələn həftə Cenevrədə Ermənistan və Azərbaycan prezidentlərinin görüşü olacaq. Bu barədə Ermənistan KİV-i hakim Respublika Partiyasının nümayəndəsi Aşotyana istinadən məlumat yayıb. Onun sözlərinə görə, erməni tərəfi qarşıdakı görüşdən Vyana və Sankt-Peterburqda qəbul edilmiş prinsiplərin Azərbaycan tərəfindən yerinə yetirilməsini, məhz sülhün bərqərarı və tərəflər arasında inamın möhkəmləndirilməsi üzrə addımların atılmasını gözləyir.

Xatırladaq ki, bu prinsiplər təmas xəttində nəzarəti, barışığın pozulmaması və pozuntuya yol verənlərin müəyyən edilməsi məqsədilə monitorinq prosedurunun gücləndirilməsini nəzərdə tutur.

Ermənistan ümid edir ki, bu prinsiplərə əməl olunması Azərbaycanın işğal edilmiş əraziləri azad etmək üçün hərbi yola əl atmasına imkan verməyəcək.

Azərbaycan isə onun münaqişəni hərbi yolla həll etməklə bağlı qanuni hüququnu məhdudlaşdıran istənilən təklifi rədd edir.-02D-