Azərbaycan və Ermənistan xüsusi xidmət orqanları birbaşa əlaqə kanalı yarada bilər (yenilənib)

Dekabrın 30-da axşam Azərbaycan Dövlət Təhlükəsizliyi Xidməti DTX rəhbəri Əli Nağıyevin Ermənistan Milli Təhlükəsizlik Xidmətinin rəhbəri Armen Abazyanla Moskva görüşü barədə məlumatı təsdiqləyib.

DTX-nın məlumatında deyilir ki, tərəflər Rusiya, Azərbaycan və Ermənistan rəhbərlərinin imzaladıqları 10 noyabr 2020-ci il tarixli üçtərəfli bəyanatdan irəli gələn öhdəliklərin yerinə yetirilməsinin hazırkı vəziyyətini müzakirə ediblər. Həmçinin sərhəd təhlükəsizliyi, işğaldan azad olunmuş ərazilərdə terrorçuluqla mübarizə, Dağlıq Qarabağ münaqişəsi nəticəsində itkin düşmüş və girov götürülmüş şəxslərin taleyinin aydınlaşdırılması, meyitlərin basdırıldığı yerlərin müəyyənləşdirilməsi və əsirlərin dəyişdirilməsi və təhlükəsizlik sahəsində qarşılıqlı maraq doğuran digər məsələlər ətrafında müzakirələr aparılıb.

Eyni zamanda zərurət yaranacağı təqdirdə məlumat mübadiləsi üçün müvafiq əlaqə kanalının təşkilinin vacibliyi də qeyd olunub. -02D-

*   *   *

2020 Dekabr 30 (Çərşənbə) 16:43:04

Azərbaycan və Ermənistan xüsusi xidmət orqanları rəhbərlərinin görüşü

Bakı/30.12.20/Turan: Dekabrın 28-də Moskvada Azərbaycan Dövlət Təhlükəsizliyi Xidmətinin rəhbəri Əli Nağıyev ilə Ermənistan Milli Təhlükəsizlik Xidmətinin rəisi Armen Abazyanın görüşü olub. Görüş Rusiya Federal Təhlükəsizlik Xidmətinin direktoru Aleksandr Bortnikovun təşəbbüsü ilə təşkil edilib.

Rusiya mənbələrinin məlumatına görə, üçtərəfli görüşün mövzusu əsirlərin mübadiləsi və itkin düşənlərin axtarışı məsələləri olub. Görüşün yekunlarına dair müxtəlif istiqamətlər üzrə razılaşmalar əldə olunub.

Hələlik Azərbaycan tərəfi bu məlumatı şərh etməyib.-02D-