Azərbaycan və Gürcüstan prezidentləri Bakıda futbol matçı zamanı baş vermiş insidenti müzakirə ediblər

Tbilisi/04.08.14/Turan-BSPRESS: Azərbaycan və Gürcüstan prezidentləri İlham Əliyevlə Georgi Marqvelaşvili telefon söhbəti zamanı Bakıda “Neftçi” və “Çixura” futbol komandaları arasında baş vermiş insidenti müzakirə ediblər. Gürcüstan KİV məlumat yayıb.

“Gürcüstan və Azərbaycan prezidentləri qeyd ediblər ki, bu cür insidentlər iki ölkə arasındakı dost münasibətlərə təsir göstərə bilməz”, - məlumatda deyilir.

İyulun 31-də matç zamanı gürcü və azərbaycanlı azarkeşlər arasında insident baş verib. “Buna gürcü azarkeşlərin Bakcell Arena stadionunun tribunasında asdıqları xəritədə Zaqatala və Qaxın Gürcüstan əraziləri kimi göstərilməsi səbəb olub”, - bundan əvvəl Azərbaycan KİV bildirib.

Qarşıdurma yaranıb, lakin polis və daxili qoşunlar kütləvi toqquşmaların qarşısını alıb.

    Azərbaycanın və Gürcüstanın hüquq-mühafizə orqanları insidenti araşdırır. Bir neçə gürcü fanat saxlanılıb, lakin sonradan buraxılıb. “Çixura” komandasının baş məşqçisi Samson Pruidze gürcü azarkeşlərin hərəkətinə görə üzr istəyib.

Ouun 0:0 hesabı ilə başa çatıb. Cavab matçı avqustun 7-də Tbilisidə Mixail Mesxi adına stadionda olacaq.-02D-