Azərbaycan və İran sərhəd idarələri rəhbərlərinin görüşü

Bakı/05.12.17/Turan: Azərbaycan Dövlət Sərhəd Xidmətinin (DSX) rəhbəri Elçin Quliyev dekabrın 2-4-də İrana rəsmi səfəri çərçivəsində İranın Sərhəd Qoşunlarının komandanı Qasım Rza­yi və İran Silahlı Qüvvələrinin Baş Qərargah rəisi Məhəmməd Hüseyn Bagiri ilə ilə görüşüb.

DSX-nin məlumatında deyilir ki, görüş zamanı dövlət sərhəddində, bu­ra­­xılış məntəqələrində və Xəzər dənizində vəziyyət müzakirə edilib.

Həmçinin sər­həd təhlükəsizliyinə təhdidlərə, o cüm­lədən beynəlxalq terror­çuluq, narkotik vasitələrin qanunsuz dövriyyə­si, qaçaqmalçılıq, qeyri-le­qal miqrasiya və digər transsərhəd cinayət­lərə qarşı birgə müba­rizənin aparılmasının vacibliyi qeyd edilib.

Ermənistan tərəfindən 20% torpaqların işğalı nəticə­sində Azərbaycan-İran sərhəddinin 132 km. hissəsinin nəzarətsiz qalması İran tərəfinin diqqətinə çat­dırılıb.

Görüş zamanı "Astara" dəmir yolu buraxılış məntəqəsinin fəaliy­yətinin təşkili, yüklərin və nəqliyyat vasitələrinin sərhədkeçmə prosedurlarının sadələşdirilməsi və sərhəd təhlükəsizliyi tədbirlərinin güc­lən­dirilməsi məsələləri ətrafında fikir mübadiləsi aparılıb.

Hər iki ölkə vətəndaşlarının rahat gediş-gəlişi, eləcə də turizmin inkişafı məqsədilə "Astara" və "Biləsuvar" buraxılış məntəqələrinin iş vaxtının uzadılmasının məqsədəuyğunluğu qeyd olunub.-06D--