Azərbaycan Xarici İşlər Nazirliyi: Qriqoryanın təxribatı cavabsız qalmayacaq

Bakı/03.09.22/Turan: Sentyabrın 2-də Ermənistan Təhlükəsizlik Şurasının katibi Armen Qriqoryanın Azərbaycan Respublikasının Xankəndi şəhərinə qanunsuz səfəri erməni tərəfinin növbəti təxribatıdır və iki dövlət arasında münasibətlərin normallaşması cəhdlərinə xələl gətirir. Bu barədə Azərbaycan Xarici İşlər Nazirliyinin mətbuat xidmətinin şərhində deyilir.

“Brüsseldə Azərbaycan və Ermənistan liderlərinin növbəti görüşündən dərhal sonra Ermənistan rəsmisi tərəfindən məqsədyönlü şəkildə atılan bu qanunsuz addım görüş zamanı əldə edilmiş razılıqlara kölgə salmaqla yanaşı, Ermənistan tərəfinin normallaşma prosesində səmimi olmadığını açıq nümayiş etdirir”, - Azərbaycan xarici  siyasət idarəsinin məlumatında  qeyd olunur.

Bu qanunsuz səfər Ermənistanın Azərbaycana qarşı ərazi iddiasının olmadığına, suverenlik və dövlət sərhədləri prinsiplərini qəbul etdiyinə dair bəyanatlarının səmimiyyətdən uzaq olduğunu göstərir.

Bu, həm də rəsmi Yerevan tərəfindən beynəlxalq vasitəçilərin səylərinə hörmətsizlikdir,  Azərbaycan Xarici İşlər Nazirliyinin şərhində vurğulanır.

“Ermənistan rəsmisinin təxribatçı addımını qətiyyətlə qınayır və vurğulayırıq ki, Azərbaycanın beynəlxalq sərhədləri çərçivəsində ərazi bütövlüyünə qarşı atılan hər hansı addım cavabsız qalmayacaq”, - Azərbaycan Xarici İşlər Nazirliyinin məlumatında deyilir. 06В