Azərbaycan XİN beynəlxalq birliyi girovların azad edilməsi üçün Ermənistana təsir göstərməyə çağırıb

Bakı/11.07.19/Turan: Azərbaycan Xarici İşlər Nazirliyi mülki şəxslər Dilqəm Əsgərov və Şahbaz Quliyevin Ermənistan Silahlı Qüvvələri tərəfindən girov götürülməsinin beşinçi ildönümü ilə bağlı bəyanat yayıb. Rəsmi Bakı dünya birliyini girovların azad edilməsi məqsədilə Ermənistana təsir göstərməyə çağırıb.

"Bu gün azərbaycanlı mülki şəxslər Dilqəm Əsgərov və Şahbaz Quliyevin Ermənistan tərəfindən girovluqda saxlanılmasının beş ili tamam olur.

D.Əsgərov və Ş.Quliyev Ermənistan tərəfindən işğal edilmiş Kəlbəcər rayonunda valideynlərinin məzarlarını ziyarət edərkən Ermənistan Silahlı Qüvvələri tərəfindən girov götürülüb, onların yanında olan Həsən Həsənov isə qətlə yetirilib. Azərbaycanın işğal edilmiş ərazilərində yaradılmış oyuncaq separatçı rejim tərəfindən uydurma iddialar əsasında mülki şəxslərimiz üzərində qurama "məhkəmə" təşkil edilərək, D.Əsgərov ömürlük, Ş.Quliyev isə 22 il müddətinə azadlıqdan məhrum edilib", - bəyanatda deyilir.

Sənəddə qeyd olunur ki, Ermənistan mülki şəxslərin girov götürülməsini qadağan edən və hərbi münaqişələr zamanı mülki şəxslərə münasibətdə humanist davranış tələb edən 1949-cu il Cenevrə Konvensiyasını pozur.

Yerevan hər iki tərəfdə saxlanılan şəxslərin "hamının hamıya" prinsipi əsasında dəyişdirlməsinə dair çağırışlara məhəl qoymur.

Rəsmi Bakı girovluqda olan soydaşlarımızın tezliklə azad edilməsi və ailə üzvlərinə qovuşması üçün ali humanizm prisiplərini rəhbər tutaraq bütün beynəlxalq ictimaiyyəti, xüsusilə ATƏT-in Minsk Qrupunun həmsədr ölkələrini, aidiyyəti beynəlxalq təşkilatları və qeyri-hökumət təşkilatlarını Ermənistana ciddi təsir və təzyiq göstərməyə çağırıb.

"Azərbaycan D.Əsgərov və Ş.Quliyevin azad edilməsi məsələsini hər zaman diqqət mərkəzində saxlaylır və mülki şəxslərimizin azad olunması üçün zəruri tədbirlər bundan sonra da davam etdiriləcək", - bəyanatda qeyd olunur.06D-