Azərbaycan XİN əcnəbiləri işğal edilmiş ərazilərdə qanunsuz fəaliyyətdən çəkinməyə çağırıb

Bakı/23.07.18/Turan: Ermənistan Azərbaycanın işğal olunmuş ərazilərində qanunsuz iqtisadi və digər fəaliyyətə görə məsuliyyət daşıyır. Odur ki, Ermənistan və üçüncü tərəf aşağıdakılara görə məsuliyyətə cəlb edilə bilər:

- İşğal olunmuş ərazilərdə məskunlaşmanın aparılması;
- Azərbaycanın təbii sərvətlərinin istismarı və ticarəti;
- İqtisadi və maliyyə fəaliyyətləri;
- İnfrastruktur dəyişiklikləri və telekommunikasiya şəbəkəsinin istismarı;
- İşğal edilmiş ərazilərin mədəni xarakteri və irsinin dəyişdirilməsi;
- İşğal edilmiş ərazilərin turizm məkanı kimi təşviq edilməsi, qeyri-qanuni səfərlərin təşkili və digər fəaliyyətlər.

Bu barədə Azərbaycan XİN mətbuat xidmətinin rəhbəri Hikmət Hacıyev bugünkü mətbuat konfransında bildirib.

Bu qanunsuz əməllərin bir qismi beynəlxalq hüquq normalarından irəli gələn öhdəliklərin ciddi şəkildə pozulmasıdır. Bu sıraya aşağıdakılar daxildir:

- Bu kimi pozuntular nəticəsində yaranmış vəziyyətin tanınmaması;
- Bu vəziyyətin saxlanması üçün hər hansı yardımın göstərilməsinin qadağan olunması;
- Bu kimi pozuntuları etmiş şəxslərin hər hansı immunitetdən məhrum edilməsi;
- Ağırlaşdırılmış məsuluyyət kimi bütün dövlətlər tərəfindən Ermənistanı məsuliyyətə cəlb etmək və ona qarşı tədbirlərin görülməsi, o cümlədən sanksiyaların tətbiq edilməsi, cinayət və mülki işlərin açılması.

H.Hacıyev beynəlxalq ictimaiyyəti, əcnəbi hüquqi və fiziki şəxsləri "Azərbaycanın işğal olunmuş ərazilərində qeyri-qanuni iqtisadi və digər fəaliyyətlərlə bağlı üçüncü tərəflərin məsuliyyətinə dair hüquqi rəy" və Ermənistan-Azərbaycan Dağlıq Qarabağ münaqişəsinin hüquqi aspektləri ilə bağlı Azərbaycanın təqdim etdiyi digər fundamental hüquqi hesabatları nəzərə almağa çağırıb.-02D-