Azərbaycan XİN: Rəsmi Yerevan məsuliyyət daşıyır

Bakı/05.07.17/:Turan: Azərbaycan XİN Ermənistan silahlı qüvvələrinin cəbhə xəttində mülki şəxslərin ölümü ilə nəticələnən növbəti irimiqyaslı təxribatı ilə əlaqədar bəyanat yayıb.

Bəyanatda erməni tərəfin iyulun 4-də ağır silahlar da tətbiq olunmaqla mülki Füzuli rayonunun Alxanlı kəndində əhaliyə və obyektlərə hədəflənən təxribat törətdiyi və təxribat nəticəsində iki nəfərin həlak olduğu və daha bir nəfərin yaralandığı deyilir: "Ermənistan silahlı qüvvələrinin bu təxribatı nəticəsində yaşlı qadın və onun 2 yaşlı nəvəsinin öldürülməsi, digər mülki şəxsin yaralanması və mülki obyektlərə ziyan vurulması vandalizm aktı olaraq Ermənistan dövlətinin terrorçu mahiyyətini bir daha sübut edir", - deyə bəyanatda vurğulanır.

Sənəddə deyilir ki, cəbhə xətti boyunca Ermənistan silahlı qüvvələri tərəfindən sıx məskunlaşmış ərazilərdə yaşayan, aralarında qadınlar, uşaqlar və ahılların olduğu mülki əhaliyə qarşı qəsdən və hədəflənən hücumların edilməsi sistematik xarakter daşıyır və bunun uyğun beynəlxalq konvensiyalara zidd olduğu deyilir: "Azərbaycan Respublikası dəfələrlə bəyan edib ki, Ermənistan silahlı qüvvələrinin işğal edilmiş Azərbaycan ərazilərində qeyri-qanuni mövcudluğu münaqişə zonasında gərginliyin və insidentlərin yaranmasının əsas səbəbidir və münaqişənin siyasi həllinə başlıca maneədir".

Bəyanatda ATƏT-in Minsk qrupu həmsədrlərinin, beynəlxalq qurumların

Ermənistanın öz qoşunlarını tezliklə Azərbaycanın işğal olunmuş ərazilərindən çıxarmasını və işğala əsaslanan status-kvonun dəyişdirilməsini tələb etməli olduğu və yaranmış vəziyyətə görə bütün məsuliyyət tam şəkildə Ermənistanın siyasi-hərbi rəhbərliyinin üzərinə düşdüyü vurğulanır.

Xatırladaq ki, iyulun 4-ü axşam saatlarında Ermənistan silahlı qüvvələri Azərbaycanın Füzuli rayonun Alxanlı kəndini 80 və 102 millimetrlik minaatanlardan və dəzgahlı qumbaraatanlardan atəşə tutub, nəticədə 1967-ci il təvəllüdlü Sahibə Quliyeva və nəvəsi 2 yaşlı Zəhra Quliyeva həlak olublar. Digər mülki şəxs Sərvinaz Quliyeva yaralanıb. -0-