Azərbaycan XİN Ukrayna səfirinin narahatlığına reaksiya verib

Azərbaycan tərəfindən beynəlxalq hüquq və BMT Nizamnaməsi əsasında Ukraynanın ərazi bütövlüyü, suverenliyi və beynəlxalq səviyyədə tanınmış sərhədlərinin toxunulmazlığına hörmətlə yanaşılır. Dövlətlərin beynəlxalq səviyyədə tanınmış sərhədlərinin zor yolu ilə dəyişdirilməsi cəhdləri qəbuledilməzdir. Turan-ın məlumatına görə, bu barədə AzərTAc-a Azərbaycan XİN-in mətbuat xidmətinin rəhbəri Hikmət Hacıyev Ukraynanın Bakıdakı səfiri Aleksandr Mişenkonun Ukraynadakı münaqişəyə dair mövqeyi ilə bağlı ifadələrinə münasibət bildirərkən deyib.

Bu günlərdə “Maydandan Maydana” kitabının təqdimatında Mişenko etiraf edib ki, Bakıda ondan israrla Rusiyanı tənqid etməməyi xahiş edirlər. Mişenko bu tövsiyələri Azərbaycan səfirlərinı Azərbaycan ərazilərinin işğalı haqqında danışmamağın məsləhət edilməsi ilə müqayisə edib. O, həmçinin Rusiyanın Ukraynaya qarşı təcavüzü ilə əlaqədar onun səlahiyyətlərinin dayandırılması haqqında məsələ üzrə səsvermə zamanı Azərbaycanın AŞPA-dakı nümayəndə heyətinin Rusiya nümayəndə heyətini dəstəkləməsi ilə bağlı təəccübünü bildirib.

Öz növbəsində, Azərbaycan XİN-in rəsmi nümayəndəsi AŞPA-da Azərbaycan nümayəndə heyətinin Rusiyanın xeyrinə səs verməsini şərh edərkən xatırladıb ki, Bakı AŞ Nazirlər Komitəsinin sədri statusunda çıxışlarında Azərbaycanın Avropa Şurasında ikili standartlar və üzv dövlətlərə qarşı seçimli yanaşmanın tətbiq edilməsinin əleyhinə olduğunu bildirib.

Eyni zamanda, Azərbaycan Avropa Şurasının əsaslandığı dəyərlər və beynəlxalq hüququn prinsiplərini kobud şəkildə pozan Ermənistana qarşı sanksiyaların tətbiq olunması barədə dəfələrlə məsələ qaldırıb. Bu kimi məsələlərdə Avropa Şurası beynəlxalq hüququn aliliyi prinsipi əsasında vahid yanaşmadan çıxış etməlidir, deyə Hacıyev bildirib. -16D-