Azərbaycan Xocalı faciəsini heç vaxt unutmayacaq - İ.Əliyev

Bakı/27.02.18/Turan: Xocalı soyqırımı erməni faşizminin, barbarlığın nümayişidir, bu barədə Azərbaycan prezidenti İlham Əliyev fevralın 26-da Rossiya-24 telekanalına müsahibəsində bildirib.

Rusiya televiziyasının çəkiliş qrupu Əliyevdən Bakıda Xocalı soyqırımı qurbanlarının xatirəsinə həsr olunmuş abidə önündə müsahibə götürüb.

"Bu gün buraya hansı düşüncələrlə gəldiniz, hansı düşüncələrlə oyandınız?", deyə jurnalist sual edib.

"Bu gün Azərbaycan xalqının tarixində qanlı səhifələrdən biri, azərbaycanlıların soyqırımı günü, Azərbaycan xalqının hər zaman xatırlayacağı və heç vaxt unutmayacağı bir gündür.

26 il əvvəl azərbaycanlılara qarşı soyqırım aktı törədilib, nəticədə 613 dinc sakin, o cümlədən 106 qadın, 63 uşaq qətlə yetirilib, 1200-dən çox dinc sakin əsir düşüb, işgəncələrə məruz qalıb, 500-ə yaxın insan şikəst qalıb, 150 dinc sakin haqqında heç bir məlumat yoxdur, onlar itkin düşmüş sayılır, amma, təbii ki, böyük ehtimalla, onlar da öldürülüb.

O dəhşətli gün, o qanlı faciə haqqında çox sayda video və fotomarterial, möcüzə nəticəsində sağ qalanların dəlilləri var. Bu, erməni faşizminin, barbarlığın nümayişi idi", deyə Əliyev bildirib.

"Biz bunu xatırlayırıq, heç vaxt unutmayacağıq. Azərbaycan daha güclü olmalıdır ki, bu faciə heç vaxt təkrarlanmasın. Siz bu matəm gününü hansı hisslərlə qarşıladığını soruçurdunuz. Düşünürəm ki, hər bir azərbaycanlı kimi, ağrı hissi, günahsız yerə öldürülənlərə görə kədər hissi, itkilərin yerinin dolmasının mümkün olmaması hissi ilə. Eyni zamanda Azərbaycan xalqının gələcəkdə belə bir faciə ilə üzləşməməsi üçün ölkəmizi möhkəmləndirmək, onun iqtisadi və hərbi potensialını gücləndirmək qətiyyəti ilə qarşılayıram", - deyə Əliyev qeyd edib. -06D-