Azərbaycan yanğınsöndürənləri Xankəndində baş verən yanğını söndürüblər

Bakı/27.09.23/Turan: Azərbaycan yanğınsöndürənləri Xankəndində yanacaqdoldurma stansiyasında baş verən yanğını uğurla söndürərək, onun səbəb ola biləcəyi fəlakətin qarşısını alıblar. 

Azərbaycan yanğınsöndürənlərinin tez və səmərəli reaksiyası yanacaqdoldurma stansiyasında alovu söndürməklə məhdudlaşmayıb. Onlar dərhal əlavə yanacaq çənlərinin qorunması da daxil olmaqla, ətraf ərazilərin mühafizəsi üzrə tədbirlər görüblər və alovun qonşu tikililərə sıçramasının qarşısını alıblar.

Hadisə yerinə gəldikdən sonra vəziyyətin ətraflı şəkildə qiymətləndirilməsi yanğının bir qrup ehtiyat yanacaq çənində baş verdiyini, bunun yanğının genişlənəcəyi riski yaratdığını göstərib.

Sentyabrın 25-də hadisə yerinə Azərbaycan Respublikası Fövqəladə Hallar Nazirliyinin Dövlət Yanğından Mühafizə Xidmətinin ümumilikdə 15 yanğınsöndürən briqadası göndərilib.

Bu arada, erməni mənbələrinin məlumatına görə, sentyabrın 26-da saat 22:00-da baş verən partlayış nəticəsində 68 nəfərin öldüyü təsdiqini tapıb, 105 nəfər hazırda itkin düşmüş hesab olunur. Xəsarət alan vətəndaşların sayı 290-dır, bu günə qədər onların 168-i Ermənistanın tibb müəssisələrinə aparılıb. Onlardan 96-sı hava yolu ilə, Ermənistan və Rusiya sülhməramlıları tərəfindən istismar olunan helikopterlərlə aparılıb, 72 nəfər isə Beynəlxalq Qızıl Xaç Komitəsinin əməkdaşlarının müşaiyəti ilə ermənilərin təcili yardım maşınları ilə aparılıb.

Ermənistan KİV-ləri Azərbaycan yanğınsöndürənlərinin və xilasedicilərinin təqdirəlayiq səyləri haqqında heç nə demir. Göründüyü qədər, onlar diqqəti bunun əvəzinə, Azərbaycan ərazilərinin erməni işğalından azad edilməsi ilə başa çatan 44 günlük müharibənin başlamasının üçüncü ildönümünə yönəldiblər. --0--