Azərbaycanda Ballıqaya qətliamı qurbanlarının xatirəsi anılır

Bakı/28.08.20/Turan: Azərbaycan Respublikasının Xarici İşlər Nazirliyi Ballıqaya qətliamının 28-ci ildönümü ilə əlaqədar bəyanat yayıb.

28 avqust 1992-ci ildə Ballıqaya kəndində Azərbaycanın 24 mülki sakini vəhşicəsinə qətlə yetirilib.

Bunlardan 6-sı altı aylıq uşaq da daxil olmaqla yetkinlik yaşına çatmayan şəxslər idi. 93 yaşlı qadın da amansız cinayətin qurbanı oldu. Əksəriyyəti uşaqlar, qadınlar və qocalar olan qətlə yetirilmiş şəxslərin bəzilərinin meyidləri yandırılıb. Qətliam nəticəsində 3 azyaşlı uşaq hər iki valideynini itirib.

Ballıqaya qətliamı Ermənistan silahlı qüvvələrinin bundan əvvəl Xocavəndin Qaradağlı kəndində, Xocalı şəhərində, Kəlbəcərin Ağdaban kəndində Qarabağın azərbaycanlı əhalisini kompakt şəkildə məhv etmək məqsədi ilə törədilən silsilə kütləvi qırğın aktlarından biridir, deyə XİN-in bəyanatında bildirilir.

Sənəddə vurğulanır ki, Azərbaycan Respublikası bu istiqamətdə milli qanunvericilik və beynəlxalq hüquqla müəyyən edilmiş bütün imkan və milli mexanizmlərdən istifadə etməklə, özünün mülki əhalisinə qarşı törədilmiş müharibə və insanlıq əleyhinə cinayətlərə adekvat hüquqi qiymətin verilməsi və günahkarların ədalət məhkəməsinə təslim edilməsi məqsədilə bütün zəruri addımları atmağa davam edəcək.

Xarici İşlər Nazirliyi Ballıqaya kəndində törədilmiş insanlıq əleyhinə cinayətin qurbanlarının xatirəsini ehtiramla yad edir. —06D-