Azərbaycanda ermənilərin raket zərbəsi endirə biləcəyi 12 obyekt

Ermənistan prezidentinin Azərbaycana raket zərbəsi endirmək əmri verməyə hazır olduğu barədə bəyanatından sonra Qarabağda erməni silahlı qüvvələrinin keçmiş komandanı Arkadi Ter-Tadevosyan nəinki bunu dəstəkləyib, hətta bu zərbələrin konkret olaraq haralara endirilə biləcəyini açıqlayıb.

Lragir nəşrinə müsahibəsində o qeyd edib ki, cavab zərbəsi endirmək üçün Azərbaycan tərəfindən yeni hücum gözləmək lazım deyil.

"Məndə insanların yaşamadığı, lakin çox mühüm mühəndislik infrastrukturlarının yerləşdiyi 12 məntəqənin işarələnmiş olduğu xəritə var. Bu yerlərə zərbə endirməklə böyük ziyan vurmaq olar. Bu, elektrik stansiyaları, qaz kəmərləri, neft kəmərləridir. Bu, həm də Mingəçevir su anbarı, Azərbaycan əhalisinin 40%-dən çoxuna xidmət edən iki güclü elektrik stansiyası, Bakı yaxınlığında yerləşən neft obyektləridir.

Bakıya deyil, bu obyektlərə zərbə endirsək, insanlar həlak olmayacaq, əvəzində strateji obyektləri məhv etmək olar ki, bu da onları ayılda bilər. Biz ikinci bir hücuma və yeni aprel hadisələrinə imkan verə bilmərik", deyən Ter-Tadevosyan, guya Ermənistanın potensial təcavüzkara qabaqlayıcı zərbə endirməsinə imkan verən BMT Nizamnaməsinə istinad edib.

Rusiyanın Ermənistana "İsgəndər"lərdən istifadə etməyə icazə verib-verməyəcəyi barədə suala cavabda o qeyd edib ki, Rusiya və digər dövlətlər müharibənin bərpa olunmasının əleyhinədir.

"Rusiyanın rolunu müəyyən etmək çətindir. Onlar həm bizimlə dostluq etmək istəyirlər, həm də Azərbaycanla və müharibə olmaması üçün əllərindən gələni edəcəklər", deyə o bildirib. -02D-