ATƏT-in Minsk Qrupunun həmsədrləri Qarabağdadırlar

ATƏT-in Minsk Qrupunun həmsədrləri çərşənbə axşamı Xankəndində Qarabağ separatçılarının lideri Bako Saakyanla görüş keçiriblər.

Ermənistan KİV-lərinin məlumatına görə, görüşün yekunları ilə bağlı Rusiyalı həmsədr İqor Popov deyib ki, həmsədrlər Saakyana Əliyev və Sarkisyanla danışıqları barədə məlumat veriblər.

Görüşdə bir sıra mövzular müzakirə olunub: onlardan biri Vyana və Sankt-Peterburq sammitlərində əldə olunmuş razılıqların həyata keçirilməsidir, deyə o bildirib.

"Biz hər bir tərəfin mövqeyini dinlədik. Bu söhbətin davamı Vyanada Minsk Qrupunun görüşündə olacaq. Biz həmçinin ATƏT rəhbərliyi ilə görüşməyi nəzərdə tuturuq. Yüksək Səviyyəli Planlaşdırma Qrupu ilə görüşmək planımız da var", deyə Popov qeyd edib.

O, Dağlıq Qarabağın danışıqlara qoşulması məsələsinin müzakirə olunub-olunmaması haqqında suala inkaredici cavab verib.

"Bu gün biz Kasprşikin qrupunun genişləndirilməsi məsələlərini müzakirə etdik. Bilirsiniz ki, onun qrupuna daha 7  nəfər artırılması  haqqında razılıq əldə olunub. Texniki məqamlarla bağlı bir sıra məsələlər də var. Bu gün Andjey Kasprşik bununla bağlı fikirlərini açıqlayıb. Bu, ümid edirəm ki, apreldə müzakirə edəcəyimiz mövzulardan biri olacaq", deyə News.am saytı Popovdan sitat gətirir. -02D-