Azərbaycanda “Masdar” şirkətinin inşa etdiyi GES istifadəyə verilib

Bakı/26.10.23/Turan: Oktyabrın 26-da prezident İlham Əliyev ərəb şirkəti “Masdar” ərəb şirkətinin inşa etdiyi 230 MVt gücündə Qaradağ Günəş Elektrik Stansiyasının (GES) açılışında iştirak edib.

Dövlət başçısının saytındakı məlumatda deyilir ki, Qaradağ GES-in tikintisi 2022-ci ildə başlayıb və 250 milyon dollara başa gəlib.

Elektrik stansiyasının istifadəyə verilməsi 110 min mənzili elektrik enerjisilə təmin edəcək, hər il 110 milyon kubmetr qaza qənaət edəcək və atmosferə 265 min ton karbon qazının atılmasının qarşısını alacaq.

Layihə Azərbaycana istilik enerjisindən asılılığı azaltmağa, bərpa olunan enerji mənbələrinin inkişafına kömək etməyə və onların Azərbaycanın enerji sistemindəki xüsusi çəkisini 16,5 faizdən 21,2 faizədək artırmağa imkan verəcək.

Məlumatlı mənbə Turan - a bildirib ki, ilkin mərhələdə  bu GES-dən elektrik enerjisi tədarükü istehlakçılar üçün tarifin artmasına səbəb olmayacaq, baxmayaraq ki, bütün dünyada bərpa olunan enerji mənbələrindən elektrik enerjisi bahadır.

"Hələlik “Masdar”  mövcud tariflərlə işləməyə razılıq verib,  belə ki, bu layihə Azərbaycan üçün ilk "qaranquşdur", faktiki olaraq pilot layihədir",- mənbə deyib. 0