Azərbaycanda Qurban bayramı qeyd olunur

Bakı/31.07.20/Turan: Bu gün müəlman ölkələrində, o cümlədən Azərbaycanda Qurban bayramı qeyd edilir.

Bu il Azərbaycan Qurban bayramını bütün əvvəlki dövrlərdən fərqli olaraq COVİD-19-pandemiyası şəraitində qeyd edir. Virusa yoluxma ehtimalının qarşısını almaq məqsədilə məscidlərdə bayram namazı qılınmayacaq. Bununla yanaşı bayramda kütləvilik, qurbanlıq heyvanların müəyyən edilmiş yerlərdən kənarda satışı və kəsimi qadağandır, qurbanlıq qoyunların onlayn satış yarmarkası təşkil olunub.

Qurbanlıq qoyunları onlayn sifariş etmək istəyənlər www.qurbanliq.kendden.az” saytına daxil olaraq 31 iyul saat 00:00-dək mövcud xanalar üzrə məlumatlarını qeyd edə və satış məntəqələrindən onlayn növbə götürə bilərlər.

Qurban kəsilməsi Həcc ziyarətinin tərkib hissəsidir, ona görə də ziyarətdə olan zəvvarların qurban kəsməsi zəruridir və bu zəvvarların Həcc ziyarətində yerinə yetirdikləri həcc əməllərinin tərkibinə daxildir. Ziyarətdən kənarda olan müsəlmanlar üçün qurban kəsmək vacib deyil. Amma imkanı olan şəxsin qurban kəsməsi Allah tərəfindən bəyənilən əməldir. 

2020-ci ildə Həcc ziyarəti də pandemiya ilə bağlı hər il olduğu kimi sayı milyonlarla olan müsəlmanların ziyarətilə keçirilmədi və Səudiyyə Ərəbistanı vətəndaşı olan iki min nəfərə yaxın müsəlmanın iştirakı ilə baş tutub. Həcc ziyarəti ancaq Səudiyyə Ərəbistanı daxilində müəyyən qaydalara əməl olunmaqla təşkil edilib.

Bu il Qurban bayramı Azərbaycanda iyulun 31-də və avqustun 1-də qeyd edilir. Bununla əlaqədar Azərbaycanda iyulun 31-i (cümə), avqustun 1-i (şənbə), 2-i (bazar) və 3-ü (bazar ertəsi) ardıcıl 4 gün qeyri-iş günüdür.

Azərbaycanın əmək qanunvericiliynə görə, Qurban bayramı rəsmi dövlət bayramları sırasına daxildir, qeyd edildiyi günlər qeyri-iş gündür. Bu bayram Azərbaycanda 1992-ci ildən dövlət səviyyəsində qeyd olunur.

Dinlər tarixində (yəhudilik, xristianlıq, islam) Qurban bayramı İbrahim peyğəmbərin oğlu İsmayılı Mina dağında qurban kəsmək istəməsilə izah edilir.

Allah İbrahim peyğəmbərin bu addımna cavab olaraq iki qoç göndərir və bəşəriyyətə Allah yolunda qurban kəsmək kimi bayramı ərməğan edir.—0—