Azərbaycanın böhrandan çıxarılması üçün «Yol xəritəsi» müzakirə edilib

Müsavat Partiyasının keçmiş sədri İsa Qəmbərin rəhbərlik etdiyi  Strateji Düşüncə Mərkəzi (SDM) şənbə günü “Böhrandan İmkana Yol Xəritəsi” adlı sənəd  müzakirəyə çıxarıb.

Müsavat Partiyasının mənzil-qərargahında keçirilən müzakirələrdə partiya funksionerləri, SDM-ə daxil olan ekspertlər və ictimai xadimlər iştirak ediblər.

“Yol xəritəsi” Azərbaycanın sosial-iqtisadi və ictimai-siyasi böhrandan çıxması üçün 8 strateji istiqaməti əhatə edir.

Sosial strategiya yoxsul təbəqəyə yardımın göstərilməsindən tutmuş işsizliyin səviyyəsinin azaldılması, əhalinin kredit probleminin həllinə qədər kompleks tədbirləri nəzərdə tutur.

Təxirəsalınmaz iqtisadi tədbirlər korrupsiyaya qarşı mübarizəni, biznesin və azad iqtisadiyyatın inkişafı üçün əlverişli mühitin yaradılmasını əhatə edir.

Təxirəsalınmaz siyasi tədbirlər siyasi məhbusların azad edilməsini, azadlıqların bərpası, siyasi, ictimai təşkilatlar və KİV-in azad fəaliyyəti üçün şəraitin yaradılmasını nəzərdə tutur.

Xarici siyasət sahəsində avroatlantik birliyə, ÜTT-yə beynəlxalq inteqrasiya nəzərdə tutulur.

Ölkə Konstitusiyasının yeni versiyasının hazırlanması üzrə komissiyanın yaradılması və bu ilin yazında konstitusiya referendumunun keçirilməsi təklif edilir.

2016-cı ilin payızında növbədənkənar parlament seçkilərinin, 2017-ci ildə vaxtından əvvəl prezident seçkilərinin keçirilməsi təklif olunur.

İsa Qəmbər qeyd edib ki, “Yol xəritəsi” ideyasının reallaşması 2018-ci ildə qeyd ediləcək Azərbaycan Demokratik Respublikasının yüzilliyi, yenilənmiş ölkənin demokratik məcrada inkişafı  üçün real imkanlar yaradır.0—