Azərbaycanın rus icması RF baş prokurorunu təxribatyönlü məqalənin müəllifini məsuliyyətə cəlb etməyə çağırıb

Bakı/12.03.20/Turan:  Azərbaycan rus icmasının sədri Mixail Zabelin Rusiya Federasiyasının baş prokuroru İqor Krasnova məktub göndərərək müəllif Vladimir Xomyakovun “Ruslar, getməyin, bizə kölələr və fahişələr lazımdır” məqaləsinə diqqət yetirməyi xahiş edib. Məqalə “Çarqrad” telekanalının saytında yerləşdirilib.

Fevralın 26-da Azərbaycanın Xocalı şəhərində azərbaycanlıların kütləvi qətliamının ildönümündə dərc edilən məqalədə yeganə məqsəd etniklərarası münaqişəyə sövq etmək, Azərbaycan və Rusiya xalqları arasında düşmənçilik və nifrət səpməkdir. Həmçinin məqalədə tarixin tamamilə təhrif edildiyinə, faktların və hadisələrin saxtalaşdırıldığına dair sübutlar təqdim edilib, məktubda deyilir.

Zabelin Xomyakovun hərəkətlərini pisləyir və qeyd edir ki,  Azərbaycan hər zaman çoxmillətli olması və öz ərazisində yaşayan bütün millətlərin, xalqların hüquqlarına hörmətlə yanaşması ilə tanınıb.

Zabelin Xomyakovun məqaləsinin Rusiya CM-in 282-ci maddəsinin və 27 iyul 2006-cı il tarixli “İnformasiya, informasiya texnologiyaları və informasiyanın qorunması haqqında” federal qanunun 10.6-cı maddəsinin tələblərini pozduğunun yoxlanmasını və müəllifin məsuliyyətə cəlb olunmasını xahiş edir.—06D-