Azərbaycanlı siyasi məhbusların şəkilləri Avropa küçələrini bəzədi! Foto+Video (Yenilənib)

Bu gün Müsavat Avropa Koordinasiya Mərkəzi (Müsavat AKM) "Siyasi məhbuslara azadlıq!" tələbi ilə növbəti aksiyasını keçirib.

Müsavat AKM-dən "Basta"ya verilən məlumata görə, aksiya çərçivəsində eyni vaxta Almaniyanın Köln, Mainz, Nürnberg və Fransanın Laval şəhərlərində izdihamlı mitinqlər baş tutub.

Aksiya Azərbaycandakı siyasi məhbusların, o cümlədən Müsavat Partiyası Şirvan şəhər təşkilatının sədri Əlikram Xurşidovun, Real Vətəndaş Hərəkatının sədri İlqar Məmmədovun, AXCP sədrinin müavinləri Gözəl Bayramlı və Fuad Qəhrəmanlının, Nida gənclər təşklatının təmsilçiləri İlkin Rüstəmzadə, Qiyas İbrahim, Bayram Məmmədov və Elgiz Qəhrəmanın, jurnalist və blogerlər Əfqan Muxtarlı, Mehman Hüseynov, Seymur Həzi, Əziz Orucov və Fikrət Fərəməzoğlunun, eləcə də Taleh Bağırzadənin və "Nardaran işi" üzrə məhkum edilmiş digər məhbusların həbsdən azad olunması tələb edilib. Aksiyalarda həmçinin Qarabağda erməni sepratçılarının girov götürdüyü Dilgəm Əsgərov və Şahbaz Quliyevin plakatları qaldırılıb, onların azad olunması tələb edilib. Azərbaycanın və Müsavat Partiyasının bayrağı altında keçən aksiyalarda dövlətimizin himni səsləndirilib.

Təkcə Almaniyanın Köln şəhərində keçirilən aksiyada yüzə yaxın mühacir iştirak edib. Aksiyada çıxış edən Müsavat AKM-in Nəzarət Təftiş Komissiyasının sədri Əli Quliyev bildirib ki, Azərbaycanda rüşvərxorluğa və korrupsiyaya qurşanmış Əliyev hakimiyyəti öz oponentlərinə qarşı şərləmə metodundan istifadə edir. O, buna sübut olaraq, Müsavat Partiyası Şirvan şəhər təşkilatının sədri Əlikram Xurşidovun heç bir əsas olmadan saxlanmasını və uydurma ittihamla həbsə atılmasını misal göstərib.

Almaniyanın Mainz şəhərində keçirilən aksiya haqqında məlumat verən Müsavat AKM-in təmsilçilərindən biri Əhməd Cəlaloğlu, aksiyada almaniyalı jurnalistlərin də iştirak etdiklərini bildirib.

"Bəyanatlarımızı Azərbaycan dilində Samir Quliyiev, ingilis dilində Səbuhi Qulusoy, alman dilində Xəzər Bayramov səsləndirdi. Almaniyanın ZDF və Algrmaynsaytunq qəzeti tədbirimizdə iştirak etdi. Bəyanatlarımızı təqdim etdik", - Əhməd Cəlaloğlu deyib.

***

"Bu gün Avropada Müsavat AKM-in təşkilatçılığı ilə 4 böyük şəhərdə siyasi məhbuslara dəstək məqsədi ilə eyni vaxtda yüzlərlə mühacirin iştirakı ilə möhtəşəm tədbirlər keçirildi. Tədbirlərin iştirakçılarına təşəkkür edirəm ki, haqsızlığa uğramış doştlarımıza dayaq durmaq, onların səslərini dünyaya çatdırmaq üçün fədakarlıq göstərdilər".

Bu sözləri Müsavat AKM-in sədri İlham Həsən "Basta"ya göndərdiyi açıqlamasında yazıb.

"Tədbirlərdə qəbul edilən qətnamələr Azərbaycan, alman, ingilis dillərində dünya ictimayyətinə çatdırıldı. Eyni zamanda beynəlxalq təşkilatlara, aparıcı dövlətlərin parlamentlerinə və Azərbaycan hakimiyyətinə ünvanlandı. Müsavat AKM olaraq bir daha Azərbaycan hökümətinə bildirmək istəyirik ki, Azərbaycanda siyasi məhbuslar azad olunana və siyasi təqiblərə son verilənə qədər bu cür etiraz aksiyaları daha geniş tərkibdə, daha sərt tələblərlə davam edəcək! Bir daha tələb edirik ki, bu qanunsuz hərəkətlərə son qoyulsun. Qarabağ probleminin həllinə laqeyidlikdən, korrupsiyadan, saxta əməllərdən, Azərbaycan dövlətciliyinə zərər vurmaqdan əl çəkin" deyə, İlham Həsənin hakimiyyətdən tələb edib.

***

Müsavat Partiyasının başqanı Arif Hacılı aksiyaya münasibət bildirib.

"Böyük əks-səda doğuran mitinqlərdə yalnız Müsavatın yeni həbs olunmuş Məclis üzvü, Şirvan şəhər təşkilatının sədri Əlikram Xurşudovun deyil, bütün siyasi məhbusların azadlığı istənildi. REAL-çıların da, cəbhəçilərin də, NİDA-çıların da, bitərəflərin də... Azadlıq mücahidlərini bir- birindən ayırmadıq. Bu, bizim missiyamızdır. Bu vətən bizimdir!", - Arif Hacılı özünün feysbuk səhifəsində yazıb.

Köln, Almaniya

Bu gün həmçinin Müsavat AKM Bayern özəyinin təşkilatçılığı ilə Almaniyanin Nürnberg şəhərində "Siyasi məhbuslara azadlıq" adı altında aksiya baş tutub. Açılışını Müsavat AKM Bayern özəyinin kordinatoru Akif Nağıyevin etdiyi aksiyada başda Müsavat partiyasının Şirvan şəhər təşkilatının sədri Əlikram Xurşudov olmaqla siyasi məhbusların haqsız yerə həbsləri vurğulandı və onların tez bir zamanda azad olunması tələb edilib.

Aksiyada Müsavat AKM Bayern özəyinin birinci müavini Arif Mikaylov öz tənqidi şeri ilə çıxış edib.

Nə qədər ki bu "ədalət" hər bir yanı bürüyəcək,

Nə qədər ki mərd oğullar zindanlarda çürüyəcək,

Nə qədər ki köçkün elim həsrət-həsrət əriyəcək,

Bu olacaq aqibəti,hökmü, fərmanı zillətin,

Bu olacaq güzəranı taptalanmış bu millətin.

Həmçinin Müsavat üzvü olmayan iştirakçılkara da söz verilib. Bəyanatı Azərbaycan dilində Samir Nağıyev, alman dilində İlqar Əlili səsləndirib.

Nürnberg, Almaniya