Azərbaycanlı siyasi mühacirlər həbs olunmuş jurnalistlərin azadlığa buraxılmasını tələb edirlər

İnsan Hüquqları İnstitutu (İHİ) və Reportyorların Azadlığı və Təhlükəsizliyi İnstitutunun (RATİ) timsalında Sürgündəki Azərbaycan Vətəndaş Cəmiyyəti Koalisiyası  (AZEX) Azərbaycanda növbədənkənar prezident seçkiləri ərəfəsində jurnalistlərə, hüquq müdafiəçilərinə və müxalifətçi fəallara qarşı repressiya dalğasına görə Azərbaycan hakimiyyətini qınayıb.

Koalisiya öz bəyanatında dövlət başçısı İlham Əliyevi bütün tənqidçilərini dərhal azad etməyə, eləcə də ölkədə azad və ədalətli seçkilərin keçirilməsi üçün lazım olan bütün fundamental azadlıqları təmin etməyə çağırıb.

AZEX söz azadlığına qarşı son repressiyaların amansızlığından narahatlığını ifadə edib.  Bu repressiyalar nəticəsində son iki ayda jurnalistlər Ülvi Həsənli, Məhəmməd Kekalov, Sevinc Vaqifqızı, Nərgiz Absalamova, Hafiz Babalı,  Teymur Kərimov, Şamo Eminov, Əziz Orucov, Ərşad İbrahimov, İbrahim Hümbətov, Elnarə Qasımova, Qabil Vəliyev və Şahin Rzayev həbs olunublar.

"Jurnalistlərin hamısına qarşı xaricdən qanunsuz maliyyə almaq kimi absurd ittihamlar irəli sürülsə də, onların təqib edilməsinin əsl səbəbi qalmaqallı antikorrupsiya araşdırmaları, Azərbaycan vətəndaşlarının sosial-iqtisadi və siyasi hüquqlarının sistematik və kütləvi şəkildə pozulduğunu aşkar edən nəşrlərdir", – AZEX-in həmsədri Emin Hüseynov hesab edir.

Koalisiya həmçinin hakimiyyətin tənqidçiləri - jurnalist Əvəz Zeynallı, hüquq müdafiəçisi Bəxtiyar Hacıyev, ekofəal Nazim Bəydəmirli və iqtisadçı alim Qubad İbadoğlunun həbsini xatırladır.

Koalisiya hesab edir ki, yaxın iki ildə Azərbaycan hakimiyyəti müstəqil vətəndaş cəmiyyəti institutlarını tamamilə məhv etmək niyyətindədir.

AZEX Avropa Şurasının baş katibi Mariya Peyçinoviç-Buriçin laqeydliyi və susqun fəaliyyətsizliyindən narahatdır. O 2023-cü ilin dekabrında Azərbaycana səfəri zamanı ölkə rəhbərliyilə görüşlər keçirib, ancaq jurnalist və hüquq müdafiəçilərilə görüşməyib.

2022-ci ilin aprelində Azərbaycana səfərindən (o da vətəndaş cəmiyyəti ilə görüşmədiyi vaxtdan) bu yana Azərbaycanda siyasi məhbusların sayı təxminən iki dəfə yarım artaraq 240 nəfərə yaxın olub.

AZEX ATƏT-in media azadlığı məsələləri üzrə xüsusi nümayəndəsi Tereza Ribeyronun Azərbaycanda jurnalistlərin kütləvi həbsinə açıq reaksiyasının olmamasından məyusdur. Belə ki, Ribeyro son aylar ərzində Azərbaycan hakimiyyətinin müstəqil KİV-ə qarşı repressiyalarına reaksiya verməkdən imtina edir.

Bununla yanaşı, AZEX Avropa Xarici Əlaqələr Xidmətinin son bəyanatını alqışlayır. Bəyanatda jurnalistlərin, hüquq müdafiəçilərinin və fəalların özbaşına saxlanılmasından narahatlıq  ifadə edilir.

Hakimiyyətin vətəndaş cəmiyyətinə qarşı açıq-aşkar repressiv münasibətini nəzərə alaraq AZEX ATƏT rəhbərlərini seçkiqabağı vəziyyəti obyektiv yerli və beynəlxalq monitorinq üçün qeyri-mümkün kimi qiymətləndirməyə və ATƏT/DTİHB-nin Azərbaycanda prezident seçkilərini müşahidə etmək missiyasını məhdudlaşdırmağa çağırıb.