Jurnalistlər Möhyəddin Orucovun işi üzrə prosesdə iştiraka nail olublar (yenilənib)

Bu gün jurnalistlər  Bakı Ağır Cinayətlər Məhkəməsində Həmkarlar İttifaqı fəalı Möhyəddin Orucovun işi üzrə prosesdə iştiraka nail olublar. Möhyəddin Orucov narkotik maddələrlə bağlı iş üzrə  ittiham olunur.

Reportyorlar məhkəmənin qəbul şöbəsinə gedərək məhkəmə sədrilə görüş tələb ediblər. Sədrin köməkçisi onların qarşısına çıxıb, bundan sonra media nümayəndələrini prosesə buraxıblar.

İclasın əvvəlində vəkil Nazim Musayev məhkəmə heyətinə etiraz edib. O xatırladıb ki, əvvəlki iclasda müdafiə tərəfinin etirazına baxmayaraq, Orucovu zalda qandallı vəziyyətdə saxlayıblar.

Avropa İnsan Hüquqları Məhkəməsinin presedent qərarlarına əsasən, proses zamanı müttəhimin məhkəmə zalında qandallı saxlanılması işgəncə sayılır. Məhkəmə "işgəncələrə göz yumduğuna" görə vəkil məhkəmə heyətinə etiraz edib. Lakin etiraz təmin edilməyib,  amma Orucovdan qandallar çıxarılıb.

Sonra vəkil ibtidai istintaq zamanı müstəntiqlərin müdafiə tərəfinin vəsatətlərinə cavablarını iş materiallarından çıxarmaq üçün vəsatət qaldırıb, çünki onlara cavab verilməyib. Lakin sonradan istintaqın cavabları işə daxil edilib və bildirilib ki, onlar 9 saylı hüquq bürosuna göndərilib.

Vəkil vəsatətə cavab verilməməsilə bağlı büronun sənədini  təqdim edib. Aşkar edilmiş saxtakarlıq səbəbindən vəkil bu cavabların iş materiallarından çıxarılmasını tələb edib. Lakin məhkəmə vəsatəti təmin etməyib və mahiyyəti üzrə dinləmələri avqustun 2-nə təyin edib.

* Orucov 13 dekabr 2023-cü ildə külli miqdarda narkotik maddə alveri ittihamı (Azərbaycan Cinayət Məcəlləsinin 234.4.3-cü maddəsi) ilə həbs edilib.

Bundan əvvəl, 2023-cü ilin oktyabrında polisə tabe olmamaq ittihamı ilə 30 sutka inzibati qaydada həbs edilmişdi. Azad edildikdən sonra Möhyəddin Orucov bildirib ki, onun həbsinin əsl səbəbi sosial şəbəkələrdə əmək hüquqlarının pozulmasına görə hakimiyyətin tənqididir. O həmçinin polis tərəfindən döyülməsindən və qeyri-insani rəftardan şikayət edib.

* * *

Bakı Ağır Cinayətlər Məhkəməsində jurnalistlərin açıq proseslərə buraxılması dayandırılıb

Bakı Ağır Cinayətlər Məhkəməsində jurnalistlərin məhkəmə proseslərinə buraxılması dayandırılıb.

İyulun 30-da jurnalistləri Həmkarlar İttifaqı fəalı Möhyəddin Orucovun işi üzrə prosesin getdiyi zala buraxmayıblar.

Belə qadağa artıq sistematik hal alıb, çünki bir neçə həftədir ki, müşahidə olunur. Məhkəmə mühafizəçiləri qadağanın səbəbləri barədə izahat vermirlər.

Bütün bunlar məhkəmənin açıqlıq prinsipinin pozulmasıdır və jurnalistlərin qanuni hüquqlarını pozur.