Bakı Cenevrə konvensiyasının pozulması ilə bağlı Ermənistanın ittihamlarını rədd edir

Azərbaycan XİN Cenevrə konvensiyasının tələblərinin pozulması ilə bağlı Ermənistanın ittihamlarını rədd edib.

Beynəlxalq humanitar hüququ məhz Ermənistan pozur və rəsmi Bakı bu barədə beynəlxalq ictimaiyyəti məlumatlandırmaq niyyətindədir.

“Əlbəttə, rəsmi Yerevan Cenevrə konvensiyasının və beynəlxalq hüququn mövcudluğunu başa düşüb”,- Azərbaycan XİN-in rəsmi nümayəndəsi HikmətHacıyev bildirib.

“Ermənistanın Azərbaycana qarşı təcavüzü, işğal edilmiş ərazilərdə qanlı etnik təmizləmə siyasəti, Xocalıda soyqırım, azərbaycanlı əsir və girovlara qarşı işgəncələrin tətbiqi, öldürülməsi və kütləvi məzarlıqlarda basdırılması və bəşəriyyətə qarşı digər belə hərbi cinayətlər sənədləşdirilib və beynəlxalq təşkilatlara təqdim edilib”, - H.Hacıyev bildirib.

Ermənistan-Azərbaycan sərhəddi boyunca azərbaycanlı mülki əhalinin hədəfə alınması, öldürülməsi və yaralanması halları daimi olaraq davam edib.

Aprelin 2-də səhər erkən saatlardan başlayaraq Ermənistan cəbhə zonasında hərbi fəaliyyətini intensivləşdirərək mülki əhaliyə qarşı müharibə cinayətləri və insanlıq əleyhinə cinayətlərə bərabər tutulan əməllər törədib.

Mülki əhaliyə qarşı artilleriya və digər ağır atəş vasitələrindən qəsdən, sistematik və hədəflənən hücumlar olub. 32 yaşayış məntəqəsinin bombalanması nəticəsində aralarında 16 yaşdan kiçik 2 uşaq olmaqla, 6 mülki şəxs həlak olub, 26 nəfər ağır yaralanıb. Çoxsaylı ictimai və şəxsi mülkiyyətə, o cümlədən mülki infrastrukturlara ciddi ziyan dəyib. 232 fərdi yaşayış evi, 99 elektrik dirəyi, 3 elektrik yarımstansiyası, kilometrlərlə su və qaz boruları dağıdılıb. Məktəblər, xəstəxanalar və ibadət yerləri də daxil olmaqla sosial müəssisələrə raket zərbələri endirilib. 

Mülki insanlara və obyektlərə dəymiş zərərin araşdırılması və qiymətləndirilməsi istiqamətində davam etdirilir.

Bu əməllərə görə öz məsuliyyətini gizlətmək üçün Ermənistan tərəfindən qurma ölüm səhnələri düzəldilir, saxta foto və video materiallar və dezinformasiya xarakterli məlumatlar yayılır:

Azərbaycan XİN bəyan edir ki, bütün bu cinayətlər barəsində dövlət olaraq Ermənistan və bu gün onun siyasi-hərbi rəhbərliyində olan şəxslərin fərdi məsuliyyəti haqqında beynəlxalq ictimaiyyətin və aidiyyəti təşkilatların məlumatlandırılması davam etdiriləcək və zəruri beynəlxalq hüquqi addımlar atılacaq.—06D-