Bakı Ermənistanda azərbaycanlı hərbçiyə hökm çıxarılmasını pisləyib

Bakı/09.05.23/Turan: Azərbaycan Xarici İşlər Nazirliyi  azərbaycanlı hərbçi Aqşin Bəbirovun 11,5 il müddətinə azadlıqdan məhrum edilməsi və digər hərbçi Hüseyn Axundovun həbsilə bağlı Ermənistanda çıxarılan hökmü qətiyyətlə pisləyib.

Mayın 8-də Azərbaycan Xarici İşlər Nazirliyi  bəyanat yayaraq Ermənistanda azərbaycanlı əsgər Aqşin Bəbirova qarşı uydurma ittihamlar üzrə qurama məhkəmə prosesinin keçirilməsini və onun xidmət yoldaşı Hüseyn Axundovun həbsini pisləyib.

Sənəddə qeyd olunur ki, əsir götürülmüş azərbaycanlı əsgərlər amansız fiziki işgəncələrdən sonra indi də bu cür məhkəmələrin vasitəsilə mənəvi və psixoloji işgəncələrə məruz qalırlar.

“Ermənistan bu cür məsuliyyətsiz davranışı ilə beynəlxalq humanitar hüquqa əsasən daşıdığı hüquqi məsuliyyətə, beynəlxalq ictimaiyyətin girovların azad edilməsi barəsində çağırışlarına və humanizm prinsiplərinə məhəl qoymadığını bir daha nümayiş etdirir”, - Azərbaycan Xarici İşlər Nazirliyinin  bəyanatında deyilir.

Qeyd olunur ki, Bakının erməni girovları, xüsusilə də yolu azaraq sərhədi keçmiş 10-dan artıq hərbçini heç bir qeyd-şərt irəli sürmədən geri qaytardığı halda Yerevanın belə addımı Ermənistanın bölgədə barışıq və etimad yaradılması tədbirlərində maraqlı olmadığını göstərir.

“Ermənistan beynəlxalq humanitar hüququn kobud şəkildə pozulması ilə müşayiət olunan bu təxribatçı fəaliyyətinə son qoymalı, girov götürülmüş əsgərləri dərhal azad etməlidir”, - bəyanatda vurğulanır.

Həmçinin Bakı girovluqda olan azərbaycanlı əsgərlərin tezliklə azad edilməsi və ailə üzvlərinə qovuşması üçün bütün beynəlxalq ictimaiyyəti, aidiyyatı beynəlxalq təşkilatları və qeyri-hökumət təşkilatlarını Ermənistana ciddi təsir və təzyiq göstərməyə çağırıb.

Ötən gün Ermənistanın Sünik vilayətinin məhkəməsi Aqşin Bəbirovu 11,5 il müddətinə azadlıqdan məhrum edib.

O, "sərhədi qanunsuz keçməkdə, dövlət sərhədindən odlu silah və hərbi sursat qaçaqmalçılığında" təqsirli bilinir. Eyni ittihamlara, hətta "qətl" ittihamına  məruz qalan ikinci hərbi Hüseyn Axundovun işi üzrə istintaq davam edir.

*Xatırladaq ki, aprelin 10-da Azərbaycan Müdafiə Nazirliyi iki əsgərin Naxçıvan-Ermənistan sərhədində azdığını bildirmişdi.

Sonradan onlardan biri Sünik vilayətinin Bnunis kəndinə gedib və kənd sakinlərindən kömək istəyib, ikincisi əsgər isə üç gün sonra Kafan şəhəri yaxınlığında saxlanılıb. Ermənilər onu amansızcasına döyüblər, videoya çəkərək sosial şəbəkələrdə yerləşdiriblər. 06B