Bakı İslam Oyunlarına hazırlaşır

“Biz şadıq ki, prezident İlham Əliyev və birinci xanım Mehriban Əliyeva  IV İslam Həmrəyliyi Oyunlarını diqqət mərkəzində saxlayırlar. Onların dəstəyi olmadan biz işi yüksək səviyyədə təşkil edə bilməzdik”,- İslam Həmrəyliyi İdman Federasiyasının (İSSF) vitse-prezidenti Hamad Kalkaba Malboum cümə günü mətbuat konfransında bildirib.

Mətbuat konfransı bir ildən sonra Azərbaycanda keçiriləcək İslam Oyunlarına hazırlıq işinin qiymətləndirilməsi üçün Bakıda keçirilən İSSF Koordinasiya Komissiyasının işinin yekunları üzrə təşkil edilib.

Gənclər və idman naziri Azad Rəhimov bildirib ki, Oyunların proqramına “zorxana” milli idman oyunu da daxil edilib və Azərbaycan bunu təbliğ etməyə çalışır.

A.Rəhimov deyib ki, hər hansı yeni idman arenasının inşası planlaşdırılmır. Yarışlara 8 min könüllünün cəlb edilməsi nəzərdə tutulub.

Futbol turnirində 8 yığma iştirak edəcək. Lakin məhz hansı komandaların qatılacağı hələlik dəqiq məlum deyil, çünki seçmə oyunları davam edir.

Həmçinin dörd kateqoriya üzrə paracüdo yarışları keçiriləcək. Biletlər yarışlar başlamazdan dörd ay öncə satılacaq.

Mətbuat konfransında həmçinin IV İslam Həmrəyliyi Oyunlarının loqotipi və brendinin təqdimatı olub.

Mayın 13-də IV İslam Oyunlarında iştirak edən ölkələrin (40-a yaxın ölkə) Milli Olimpiya komitələrinin nümayəndələrinin iclası keçirilir. Onlar idman qurğuları ilə tanış olacaq, təhlükəsizlik, idmançıların yerləşdirilməsi, nəqliyyat və digər məsələləri müzakirə edəcəklər.

Xatırladaq ki, İslam Həmrəyliyi Oyunları 2017-ci il mayın 12-22-də keçiriləcək.02D-