Bakı-Moskva-Bakı xüsusi reysi ilə bütün arzu edənlər səyahət edə bilməyib

Bakı/05.08.20/Turan: Avqustun 5-də AZAL Dövlət Şirkəti Bakı-Moskva-Bakı marşrutu üzrə xüsusi reys həyata keçirib.

Şirkətin mətbuat xidmətindən Turan-a verilən məlumata görə, RF-nin Azərbaycandakı səfirliyindən icazəsi olan şəxslər Moskvaya bilet əldə edə biliblər.

Moskva-Bakı istiqamətində isə reysə Azərbaycan vətəndaşları ilə yanaşı, onların ailə üzvləri (ata, ana, həyat yoldaşı, övladı, qardaşı/bacısı), həmçinin diplomatik və xidməti pasportu olan əcnəbilər, Azərbaycan Respublikasında işləmək icazəsi olan əcnəbilər, Azərbaycan Respublikasında müvəqqəti və ya daimi yaşamaq icazəsi olan əcnəbilər buraxılır.

Hər iki istiqamətdə uçan sərnişinlər uçuşdan əvvəl koronavirus testindən keçir.

AZAL-ın reyslərinə bilet satışı hüququ olan agentliklərin siyahısı şirkətin saytında dərc edilib. Bu agentliklərdən birinin nümayəndəsi Turan-a xüsusi reyslərə biletlərin satışındakı çətinliklərdən danışıb.

“Biz bileti rəsmiləşdirə bilərik, amma xeyli sayda nüanslar var ki, sərnişin onları həll etməlidir. Moskvaya getmək üçün Rusiya səfirliyindən və ya Rusiya Federasiyasının Dövlət Xidmətlərinin saytında icazə və kod almaq lazımdır. Bundan sonra vətəndaş bu kodu bizə təqdim etməlidir və yalnız o halda bilet almaq olar.

Həm də məlumat yayılıb ki, bileti yalnız AZAL-ın saytından almaq lazımdır, AZAL sərnişinə link yollayacaq və bu link vasitəsilə o ödəniş edə biləcək. Bizim müştərilərimizin çoxu dünən imtina cavabı alıb, çünki qeydiyyatdan keçə və kod ala bilməyiblər. Kod olanlara da hansısa qəribə məsələyə görə imtina gəlib”, deyə mənbə bildirib. -06D-