Bakı-Naxçıvan-Bakı marşrutu üzrə avtobus reyslərinin sayı iki dəfə artırılacaq

Bakı/22.09.23/Turan: Azərbaycan və İran bu islam respublikasının ərazisilə Bakı və Naxçıvan arasında avtobus reyslərinin sayının iki dəfə artırılması barədə razılığa gəliblər. Bu barədə razılıq Azərbaycan-İran birgə komissiyasının iclasında əldə olunub, Azərbaycan Yerüstü Nəqliyyat Agentliyi bildirib.

Gündəlik reyslərin sayı 3-dən 6-ya qaldırılacaq.

İkitərəfli görüşdə həmçinin Azərbaycanla İran arasında beynəlxalq avtomobil daşımaları sahəsində mövcud vəziyyət, statistik məlumatların mübadiləsi, avtodaşıyıcıların qarşılaşdıqları problemlər və  onların həlli yolları müzakirə edilib.

Müzakirələrin sonunda müvafiq qərarlar qəbul edilib.

Komissiyanın iclasında hər iki ölkənin nəqliyyat vasitələrinə tətbiq olunan vergi və rüsumların miqdarı, daşımaların inkişaf perspektivləri də nəzərdən keçirilib.

Ermənistanın təcavüzü nəticəsində 1990-cı illərin əvvəllərindən Azərbaycanla onun Naxçıvan eksklavı arasında quru əlaqəsi kəsilib və daşımalar İran vasitəsilə həyata keçirilir.

Azərbaycan, Ermənistan və Rusiya liderlərinin 10 noyabr 2020-ci il tarixli üçtərəfli bəyanatına əsasən, erməni tərəfi Azərbaycanın qərb rayonları ilə Naxçıvan Muxtar Respublikası arasında nəqliyyat kommunikasiyalarını açmağı öhdəsinə götürüb. Lakin Ermənistan bu öhdəliyi yerinə yetirmir. 06B