Bakı və Vaşinqton arasında növbəti lobbi sazişi

Mayın əvvəllərində Vaşinqtonda Greenberg Traurig lobbi şirkəti Bakının “hüquq-müdafiə qrupu” ilə ABŞ-da dövlət orqanları ilə əlaqələrin təminatı üçün xidmətlərin göstərilməsi üzrə müqavilə imzalayıb.

Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) adlı hökumətyönlü qrup 3 ay ərzində hər ay  Greenberg Traurig  şirkətinə 25 000 $ ödəyəcək. Bu barədə ABŞ Ədliyyə Nazirliyinin saytında dərc edilən sənəddə deyilir.

Müqaviləni AVCİYA sədri Elxan Süleymanov (Azərbaycan parlamentinin üzvü) və Elan Broytman imzalayıb. O, əvvəllər Klinton administrasiyasında USAİD-in baş müşaviri olub.

“Müqavilədə İki şirkət arasında biznesin mahiyyəti belə təsvir edilir: natamam qanunvericiliklə əlaqədar məsləhət və tövsiyələr, həmçinin hökumət və ictimai rəy liderlərinin məlumatlandırılması”.

Turan-ın müxbiri Greenberg Traurig –dən şərh ala bilməyib.

Prezidentə yaxın olduğu bildirilən E.Süleymanov Azərbaycanda  beynəlxalq strategiyada roluna görə yaxşı tanınır. Bu, “kürü diplomatiyası” – yəni, qiymətli hədiyyələr, səfərlər və beynəlxalq siyasətçilər üçün digər üstünlüklər kimi təsvir edilib.

2012-ci ilin “Avropa sabitlik təşəbbüsləri” hesabatına görə, kürü, ipək xalçalar, həmçinin pul vəsaitləri Azərbaycanın AŞPA-dakı dostlarına onların Bakıya səfəri zamanı verilib.

2007-ci ildə təbliğat fəaliyyətinin təşkili üzrə məsləhətləşmələr üçün Azərbaycandan xüsusi nümayəndə heyəti Vaşinqtona  gedib, - Turan-a adının çəkilməsini istəməyən amerikalı lobbiçi bildirib.

Onun sözlərinə görə, səfər Bob Lawrence & Associates lobbi qrupu tərəfindən təşkil edilib.

Neftlə zəngin Azərbaycan ölkədə müstəqil səslərə qarşı repressiyalar fonunda Qərbdə lobbiçilik səylərinə görə çox tənqid olunur.

Bununla belə, son illər Bakı Azərbaycan haqda sərt fikirləri yumşaltmaq məqsədilə Vaşinqtonda Podesta Group kimi bir sıra lobbi qrupu ilə saziş imzalayıb. -025В-