Bakıda Aİ ilə tvinninq layihələrin başlanmasının 10 illiyi qeyd olunub

Azərbaycan Avropa İttifaqı ilə tvinninq layihələrin reallaşması üzrə regionun lideridir. Bunu bu gün iqtisadiyyat nazirinin müavini Sahil Babayev tvinninq proqramların başlanmasının 10 illiyinə həsr olunmuş konfransda bildirib.

O qeyd edib ki, ötən müddətdə 45 tvinninq layihə razılaşdırılıb ki, bunun da 26-ı artıq başa çatıb.

“Tvinninq layihələr qanunun,   inzibati idarəetmənin təkmilləsdirilməsinə xidmət edir”, - o deyib.

Azərbaycanla Aİ arasında əməkdaşlığa toxunan S.Babayev qeyd edib ki, Aİ Azərbaycanın ən böyük ticarət tərəfdaşıdır.

“Əgər 2016-cı ildə Aİ ilə əmtəə dövriyyəsi Azərbaycanın bütün əmtəə dövriyyəsinin 35%-ni təşkil edirdisə 2017-ci ilin ilk iki ayında bu göstərici 42%-dək artıb”,  - o bildirib.

S.Babayev deyib ki, Azərbaycanda xarici investisiyaların 45%-i Aİ-nin payına düşür. Mütləq ifadədə investisiyaların həcmi 20 mlrd. dollar təşkil edib. Qeyri-neft sektorunda investisiyanın 35%-i Aİ ölkələrinin payına düşür. Aİ Azərbaycanda layihələrə 582 mln. avro xərcləyib.

Aİ-nin Azərbaycan nümayəndələyinin rəhbəri Malena Mard bildirib ki, hazırda tvinninq layihələrin nəticələrini görmək olar. Bunlardan qanunvericiliyin təkmilləşdirilməsini, layihələrin reallaşması nəticəsində əldə edilən təcrübəni göstərmək olar.

“Sevindirici haldır ki, ayrı-ayrı tvinninq layihə başa çatdıqdan sonra tərəflər arasında əməkdaşlıq davam edir”, - o vurğulayıb.

M.Mard bildirib ki, son 5 ildə tvinninq layihə çərçivəsində 300-dən çox seminar keçirilib, müxtəlif nazirliklərin nümayəndələri üçün 100-dən çox səfərlər təşkil edilib.–71D-