Bakıda Ermənistanın yeni hökumətinin doğru nəticələr çıxaracağına ümid edirlər

Bakı/21.06.21/Turan: Azərbaycan beynəlxalq hüquq norma və prinsiplərinə əsaslanaraq, Ermənistanla münasibətlərin sərhədlərin pozulmazlığı və ərazi bütövlüyü prinsipləri əsasında bərpasının tərəfdarıdır. Bu barədə Azərbaycanın xarici işlər naziri Ceyhun Bayramov Qazaxıstanlı həmkarı Muxtar Tleuberdi ilə danışıqlarının yekunlarına həsr edilmiş mətbuat konfransında bildirib.

Ermənistan parlamentinə seçkilərin nəticələrini şərh edən nazir deyib: “Dünən Ermənistanda növbədənkənar parlament seçkiləri keçirildi, yeni hökumətin formalaşdırılması gözlənilir. İnanırıq ki, Ermənistan hakimiyyəti böhranın səbəblərini təhlil edərək doğru nəticələr çıxaracaq”.

Onun fikrincə, böhranın səbəbi heç də müharibədə məğlubiyyət deyil, səbəb Ermənistanın onillər boyunca beynəlxalq hüququ pozaraq, güc tətbiq edərək, dövlətlərin qəbul edilmiş sərhədlərini dəyişdirərək həyata keçirdiyi təcavüz siyasətindədir.

Nazirin sözlərinə görə, Azərbaycan beynəlxalq hüquq norma və prinsiplərinə əsaslanaraq, münasibətlərin sərhədlərin pozulmazlığı və ərazi bütövlüyü prinsipləri əsasında bərpasının tərəfdarıdır. İndi Ermənistan özü qərar verməlidir, deyə o əlavə edib. Bu zaman nazir vurğulayıb ki, üçtərəfli bəyanatların bəzi müddəalarının yerinə yetirilməsi gecikdirilir.

“Qazaxıstanlı həmkarıma yüz minlərlə məcburi köçkünün doğma yurdlarına qayıtması zərurəti haqqında məlumat verdim. Biz həmçinin bu istiqamətdə potensial əməkdaşlığı müzakirə etdik”, deyə o qeyd edib.

Nazir həmçinin Ermənistanın bütün minalanmış sahələrin xəritələrini təqdim etmədiyini bildirib. 10 noyabr 2020-ci il tarixli üçtərəfli bəyanatın imzalanmasından ötən dövr ərzində minaya düşən 28 Azərbaycan vətəndaşı həlak olub, 120 nəfərdən çox insan yaralanıb. “Bu yaxınlarda Ermənistan beynəlxalq vasitəçilərin iştirakı ilə Ağdam üzrə mina xəritələrini təqdim edib. Təkcə bir rayonda minaların sayı 97 min təşkil edir. Bu, öz-özlüyündə mina təhlükəsinin səviyyəsini göstərir”, deyə Bayramov qeyd edib. -06D-