Baş Prokurorluğun Niyaməddən Əhmədovun işi haqqında məlumatı

Bakı/19.05.20/Turan: Baş Prokurorluq Xalq Cəbhəsi Partiyasının fəalı Niyaməddin Əhmədovun həbsi ilə bağlı rəsmi məlumat yayıb. Məlumatda Əhmədovun Almaniyada mühacirətdə olan Qabil Məmmədovdan pul vəsaiti aldığı iddia edilir.

DTX və Baş Prokurorluq tərəfindən həyata keçirilmiş istintaq-əməliyyat tədbirləri zamanı "Məmmədov Qabil Əmrah oğlunun Azərbaycan Respublikası ərazisində 2015-2017-ci illərdə törətdiyi aldatma və etibardan sui-istifadə etmə yolu ilə külli miqdarda özgə əmlakını ələ keçirmə cinayət əməllərinə görə məsuliyyətdən yayınmaq məqsədi ilə Almaniya ərazisində sığınacaq alaraq Azərbaycan Respublikası ərazisində terrorçuluğa hazırlıq və terrorçuluğa açıq çağırışlar etməsinə əsaslı şübhələr müəyyən edilib".

"Q.Məmmədovun əvvəllər konkret cinayət əməllərinə görə məhkum olunmuş həmfikirləri və havadarları ilə qabaqcadan əlbir olduğu qrupda gizli təşkilatlanıb Azərbaycan Respublikasında ictimai təhlükəsizliyi pozmaq, əhali arasında vahimə yaratmaq, dövlət hakimiyyət orqanları tərəfindən qərar qəbul edilməsinə təsir göstərmək məqsədilə terror aktları törətmək üçün 2019-cu ildə sosial şəbəkələr vasitəsi ilə yayımladığı çoxsaylı videoçıxışlarında özünə tərəfdar bildiyi və dəstək verəcəklərini güman etdiyi həmfikirlərinə müraciət edərək silahlanıb mümkün kütləvi aksiyaların gedişində Azərbaycan Respublikasının hakimiyyət orqanlarının yüksək vəzifəli şəxslərini, o cümlədən ictimai asayişi qoruyan polis əməkdaşlarını qətlə yetirmək, onların evlərini yandırmaqla terrorçuluğun törədilməsinə yönələn açıq çağırışlar etməsinə əsaslı şübhələr müəyyən edilib", deyə məlumatda bildirilir.

Bu cinayətlərin hazırlanması üçün o, etibar etdiyi şəxslərə, o cümlədən Əhmədova pul göndərib. Əhmədovun terrorçuluğun maliyyələşdirilməsində istifadə olunacağını bilə-bilə həmin pul vəsaitlərini qəbul etdiyini iddia edən prokurorluq həmin terror aktlarının "başa çatdırılmadığını" etiraf edir. Niyaməddin Əhmədova qarşı Cinayət Məcəlləsinin 214-1-ci (terrorçuluğu maliyyələşdirmə) maddəsi ilə ittiham irəli sürülüb və o həbs edilib, deyə Baş Prokurorluq bildirir.

Bir müddət əvvəl AXCP lideri Əli Kərimli Pressklub TV-nin "Rakurs" verilişinə müsahibəsində bildirib ki, Məmmədovun AXCP ilə heç bir əlaqəsi yoxdur və o, özünü AXCP tərəfdarı adlandırsa da, onun öz videoçıxışlarında dedikləri onun şəxsi fikridir. -06D-