Baş Prokurorluq Bakı-Ceyhan neft kəmərinin atəşə tutulmasının detalları barədə

Bakı/07.10.20/Turan: Azərbaycan Baş Prokurorluğu gecə saatlarında Ermənistan Silahlı Qüvvələrinin Azərbaycanın qərb hissəsində neft və qaz kəmərlərini raket atəşinə tutmasının detallarını açıqlayıb.

Xəbər verildiyi kimi, oktyabrın 6-da axşamdan keçmiş Qarabağ döyüş zonasından 50 km. aralıda yerləşən Yevlax rayonunun Aran qəsəbəsi Ermənistan ərazisindən raket atəşinə tutulub. Böyük dağıdıcı qüvvəyə malik, içərisində 300 ədəd 9N235 bombacıqları olan qəlpəli “Smerç” 9M525 reaktiv yaylım atəşli raket Azərbaycan Silahlı Qüvvələri tərəfindən havada zərərsizləşdirilib.  Nəticəsində raketin içərisində olan bombacıqlardan bir hissəsi Yevlax rayonu Aran qəsəbəsindən keçən diametri 42 düym olan Cənub Qafqaz Genişlənmiş Boru kəmərinin boru xəttinin üzərinə, bir hissəsi həmin ərazidən keçməklə xam nefti Qara dəniz sahilinə nəql edən Qərb İxrac Boru kəmərindən 120 metr məsəfəyə, digər hissələri isə həmin qəsəbədən keçən Bakı-Tibilisi-Ceyhan Neft kəmərindən 100 metr məsafəyə səpələnib.

Faktlarla bağlı Azərbaycan Baş Prokurorluğu oktyabrın 6-da Azərbaycan CM-in bir neçə maddəsi ilə cinayət işi qaldırıb. Zəruri əməliyyat-istintaq hərəkətləri aparılır. Azərbaycanın Baş Prokurorluğu beynəlxalq təşkilatlara Ermənistanın fəaliyyəti barədə məlumat verir. -02D