Bayramov-Mirzoyan görüşü olacaqmı?

Azərbaycan və Ermənistan Xarici İşlər nazirliklərinin rəhbərləri Nyu-Yorkda Birləşmiş Millətlər Təşkilatı Baş Assambleyasının işində iştirak edirlər. Bu tədbir çərçivəsində hər iki nazir ikitərəfli görüşlər keçirir.

ABŞ Dövlət Departamentinin nümayəndəsi Metyu Miller sentyabrın 17-də brifinqdə deyib ki, Vaşinqton "davamlı və layiqli sülh sazişinə nail olmaq üçün hər iki ölkənin səylərini dəstəkləyir".

Turan-ın  müxbirinin “ABŞ Birləşmiş Millətlər Təşkilatı Baş Assambleyası çərçivəsində iki ölkə nümayəndələrinin görüşünü təşkil etmək niyyətindədirmi” sualının  cavabında Miller qeyd edib: "Məndə heç bir məlumat yoxdur...Əlbəttə ki, hər zaman biz Ermənistan və Azərbaycan xarici işlər nazirlərini bir araya gətirmək üçün imkanlar axtarırıq".

Hələlik Bakı, Yerevan və Vaşinqton Nyu-Yorkda Bayramov-Mirzoyan görüşünün mümkünlüyünü bildirməyiblər.