Bəxtiyar Ersayın təyinatı Azərbaycan-Türkiyə hərbi ittifaqının konstatasiyasıdır

Bakı/12.12.22/Turan: Türkiyəli general Bəxtiyar Ersayın Azərbaycan müdafiə nazirinin müşaviri təyin edilməsi Azərbaycan-Türkiyə hərbi əməkdaşlığının yeni səviyyəyə yüksəldilməsinin növbəti sübutudur. Bu fikri politoloq Şahin Cəfərli Turan-ın müxbirilə söhbətində söyləyib.

Onun fikrincə, birgə hərbi təlimlər, iki ölkə Silahlı Qüvvələrinin qarşılıqlı fəaliyyətinin koordinasiyası, Bakı və Ankaranın digər addımları zərurət yarandığı halda Azərbaycan və Türkiyə ordularının birgə hərbi əməliyyatlar keçirməsi məqsədi daşıyır.

Dekabrın əvvəlində iki ölkənin İranla sərhəddə keçirdiyi sonuncu hərbi təlimlər İran rəhbərliyinin Azərbaycana qarşı aqressiv davranışı və Qarabağdakı Rusiya sülhməramlılarının hərəkətlərilə üst-üstə düşüb.

Türkiyə Quru Qoşunlarının Əməliyyat İdarəsinin rəisi olan general Bəxtiyar Ersay hərbi məsələlərlə bağlı Azərbaycan rəhbərliyinə məsləhətlər verib. Sirr deyil ki, 44 günlük İkinci Qarabağ müharibəsində hərbi əməliyyatların planlaşdırılmasında onun xüsusi rolu olub.

Azərbaycan Silahlı Qüvvələrinin o vaxtkı Baş Qərargah rəisi Nəcməddin Sadıqov və onun yaxın çevrəsi məhz o zaman kənarlaşdırıldı. Bundan sonra Ersay və türkiyəli digər zabitlər azərbaycanlı zabitlərə yardım etdilər.

Müharibə bitdikdən sonra Ərsay Türkiyə Silahlı Qüvvələrinin Azərbaycan üzrə Əməliyyat Qrupunun komandiri təyin edilib. Bu qrup Azərbaycan ordusunun yenidən təşkili və birgə təlimlərin keçirilməsi üçün yaradılıb. Qrup Azərbaycanda daimi əsaslarla fəaliyyət göstərir.

Sirr deyil ki, Azərbaycan öz Silahlı Qüvvələrinin Türkiyə (NATO) standartları üzrə yenidən təşkil olunduğunu bəyan edib. Göründüyü kimi, Türkiyə tərəfdən bu vəzifənin icrasına məhz Ersay cavabdehlik daşıyacaq. Eyni zamanda o, Türkiyə Silahlı Qüvvələrinin Diyarbəkirdə yerləşən 7-ci korpusunun komandiri olaraq qalır”, - Cəfərli bildirib. 0