Beynəlxalq təşkilatlar Qubad İbadoğluna qarşı təqibə son qoyulmasına çağırırlar

İyulun 23-də bir sıra beynəlxalq təşkilatlar Qubad İbadoğlunun həbsindən bir il ötməsilə əlaqədar birgə bəyanat yayaraq Azərbaycan hakimiyyətini tənqidi səslərə qarşı siyasi təqiblərə son qoymağa, siyasi məhbusları azad etməyə çağırıblar.

“Azərbaycanda hüquq müdafiəçiləri, jurnalistlər, siyasi müxalifət üzvləri, qeyri-hökumət təşkilatlarının liderləri də daxil olmaqla, geniş təbəqəni hədəf alan vətəndaş cəmiyyətinə qarşı davam edən repressiyaları qətiyyətlə pisləyirik. Xüsusilə, bir il əvvəl bu gün zorakılıqla və haqsız yerə həbs edilən doktor Qubad İbadoğlunun dərhal və qeyd-şərtsiz azad edilməsinə çağırırıq”, -bəyanatda qeyd edilir.

Bəyanatı Amnesty International, Human Rights Watch, Norveç Helsinki Komitəsi, Transparency International” və 10-dan artıq digər insan hüquqları təşkilatları imzalayıblar.

Noyabrda Birləşmiş Millətlər Təşkilatının İqlim Konfransına (COP29) ev sahibliyi edəcək Azərbaycanın qlobal diqqət mərkəzində olduğunu bildirən bəyanat müəllifləri qeyd edir ki, Birləşmiş Millətlər Təşkilatının İqlim Dəyişikliyi üzrə Çərçivə Konvensiyasına üzv dövlətlər Azərbaycan hökumətinə insan hüquqları üzrə öhdəliklərinə riayət etməsi, o cümlədən əsassız həbs edilmiş fəalları və hüquq müdafiəçilərini dərhal və qeyd-şərtsiz azad etməsi üçün təzyiq etməlidir.

“Qubadın və digər siyasi məhbusların həbsdə olması faciəvi haldır. Bu həbslər davam etdikcə Azərbaycan hazırkı rəhbərlik altında istədiyi beynəlxalq hörməti görməyəcək”, ABŞ-ın Azərbaycandakı keçmiş səfiri Riçard Kazlariç deyib.

Bəyanatda həmçinin İqlim Dəyişikliyi üzrə Çərçivə Konvensiyası katibliyinin Azərbaycanda insan hüquqlarının ağır vəziyyətini nəzərə alaraq, iqlim konfransında vətəndaş cəmiyyətinin iştirakını təmin etmək üçün Azərbaycan hökumətilə işləməli olduğu vurğulanır.

“Atam kimi şəxslərin öz fikirlərinə görə həbs edildiyi və işgəncələrə məruz qaldığı bir ölkədə iqlim dəyişikliyi ilə bağlı əhəmiyyətli irəliləyiş əldə edilə bilməz. 300-dən çox insanın siyasi baxışlarına görə həbsdə olduğu Azərbaycanda COP29 keçirilə bilməz”,- Qubad İbadoğlunun oğlu İbad Bayramov vurğulayıb.

Xatırladaq ki, tanınmış iqtisadçı İbadoğlu saxta valyuta hazırlamaqda ittiham olunub və ötən il iyulun 23-də həbs edilib.

Yerli və beynəlxalq təşkilatların çoxsaylı çağırışlarından sonra bu il aprelin 22-də İbadoğlunun həbsi ev dustaqlığı ilə əvəz olunub.

Qubad İbadoğlu ona qarşı irəli sürülən ittihamları qəbul etmir və həbsinin siyasi sifariş olduğunu bildirir.