"Biz gürcü xalqının tərəfindəyik" - ABŞ Gürcü Arzusuna təzyiqləri davam etdirəcək

Bazar ertəsi ABŞ bildirib ki, hakim Gürcü Arzusu Partiyası liderlərinin Avropa İttifaqına daxil olmaq barədə danışıqların dayandırıldığını elan etməsindən sonra ardıcıl dörd  gündür etiraz edən "gürcü xalqının tərəfindədir".

"Biz açıq şəkildə işarə etdik ki, Avropa ilə inteqrasiyadan imtina etməklə bağlı hakimiyyətin addımlarından narahatıq". "Biz gürcü xalqının tərəfindəyik", - brifinq zamanı Dövlət Departamentinin nümayəndəsi Metyu Miller Turan-ın suallarını cavablandırarkən deyib.

Ötən həftə sonu Gürcüstanın hər yerində on minlərlə etirazçı polisin izdihamı dağıtmaq üçün suatanlardan, gözyaşardıcı qazlardan və zəhərli qazlardan istifadə etməsinə məhəl qoymayaraq küçələrə çıxıb ki, bu da çoxsaylı toqquşmalara səbəb olub.

Bazar ertəsi Vaşinqtonda onlarla gürcü-amerikalı Dövlət Departamentinin qarşısında toplaşaraq Bayden administrasiyasını Gürcüstanın hakim partiyasına qarşı çevik hərəkətlərə çağırıb.

Avropa İttifaqı və ABŞ polisin dinc etirazçılara qarşı həddindən artıq güc tətbiq etməsini pisləyiblər, Vaşinqton isə hakimiyyətin “antidemokratik hərəkətlərinə görə” Tbilisi ilə strateji tərəfdaşlığını dayandırıb.

Bazar ertəsi üç Baltik dövləti - Estoniya, Latviya və Litva Gürcüstanda qanuni etirazları yatıranlara qarşı viza sanksiyalarının tətbiq olunduğunu elan ediblər.

Bazar ertəsi günorta dərc edilən Ümumbaltik qara siyahısına  11 gürcü xadim, o cümlədən hakim partiyaya sərt nəzarət edən və Rusiya ilə sıx əlaqələri olan oliqarx Bidzina İvanişvili daxildir.

Turan-ın müxbirinin “ABŞ Gürcüstan möəmurlarına qarşı daha sərt tədbirlər görməyə hazırdırmı?” sualının cavabında  o işarə edib ki, sanksiyalar davam edəcək.

"Biz bunu edəcəyik. Siz artıq Gürcüstan hökumətinin vəzifəli şəxslərinə qarşı sanksiyaları gördünüz. Viza məhdudiyyətlərini və Gürcüstan hökumətinə verdiyimiz 95 milyon dolların dondurulmasını  və digər hərəkətləri  necə tətbiq etdiyimizi gördünüz", - o deyib.