BMT Beynəlxalq Məhkəməsi Ermənistan və Azərbaycan arasında məhkəmə çəkişmələri çərçivəsində dinləmələri 14-19 oktyabr tarixlərinə təyin edib

Bakı/01.10.21/Turan: Oktyabrın 14-15-də Haaqada BMT Beynəlxalq Məhkəməsində Ermənistanın Azərbaycana qarşı İrqi ayrı-seçkiliyin bütün formalarının ləğv edilməsi haqqında Beynəlxalq Konvensiyanın pozulmasına dair iddiasına baxılacaq.

18-19 oktyabr tarixlərində məhkəmə Azərbaycanın Ermənistana qarşı analoji iddiasına baxacaq, bu barədə Haaqa məhkəməsinin mətbuat xidmətinin məlumatında deyilir.

14-15 oktyabr tarixlərində keçiriləcək dinləmələr Ermənistanın qabaqlayıcı tədbirlər görülməsi haqqında tələblərinə həsr olunacaq, 18-19 oktyabr tarixlərində isə Azərbaycanın anoloji tələbinə baxılacaq.

Pandemiya ilə əlaqədar görüşlər hibrid formatda keçiriləcək. Bəzi hakimlər dinləmələrdə iştirak edəcək, digərləri isə videoəlaqə vasitəsi ilə qoşulacaq. Tərəflərin nümayəndələri də dinləmələrdə şəxslər və ya videoəlaqə vasitəsilə iştirak edə bilərlər, deyə məhkəmədən bildiriblər.

Xatırladaq ki, Ermənistan Azərbaycanı İkinci Qarabağ müharibəsinə qədər, müharibə zamanı və müharibədən sonra ayrı-seçkilikdə ittiham etməyə çalışır.

Azərbaycan Ermənistanı azərbaycanlıların hüquqlarını pozmaqda, etnik təmizləmələrdə və dinc sakinləri öldürməkdə, mədəni irsin məhv etməkdə ittiham edir. -02В-