BMT ekspertləri Bakını cinsi azlıqların hüquqlarının pozulması faktlarını araşdırmağa çağırıblar

Cenevrə/13.10.17/Turan: BMT ekspertləri Azərbaycan hakimiyyətini geylərin və transgenderlərin hüquqlarının pozulması haqqında bütün məlumatları ətraflı şəkildə araşdırmağa çağırıb.

BMT İnsan Hüquqları İdarəsinin cümə günü yaydığı bəyanatda sentyabrın ortalarında Bakıda polis reydlərinin həyata keçirilməsindən, 80 nəfərdən çox insanın homoseksual və transgender olması, fahişəliklə məşğul olması iddiası ilə saxlanmasından bəhs edilir.

Polisdə onların döyüldüyü, işgəncələrə məruz qoyulduğu, alçaldıldığı, tamamilə təcrid vəziyyətdə saxlanıldığı bildirilirdi.

BMT ekspertlərin fikrincə, bu təcrübə Azərbaycanın beynəlxalq hüquq müdafiə sazişləri üzrə öhdəliklərini pozduğunu göstərir.

"Azərbaycan tamamilə qadağan edilmiş və işgəncə və amansız davranış kimi qiymətləndirilən və şəxsi həyatın toxunulmazlığının pozuntusu olan məcburi tibbi testlərə dərhal son qoymalıdır", deyə ekspertlər bildirib.

"Biz hakimiyyəti ayrı-seçkilik salmadan hamının, o cümlədən gey və ya transseksual kimi qəbul edilən insanların, habelə cinsi işçi hesab olunanların hüquqlarını müdafiə etməyə çağırırıq.

Biz Azərbaycan hakimiyyətini insanların cinsi meyllərinə və ya gender kimiyinə əsaslanan dərin kök salmış mənfi sosial təsəvvürlərə,yanlış təsəvvürlərə və mülahizələrə qarşı mübarizə məqsədilə, onlara qarşı törədilən zorakılıq və ayrı-seçkiliyin əsas səbəblərini aradan qaldırmaq üçün təhsil və dövlət siyasəti vasitəsilə konkret addımlar atmağa çağırırıq", deyə onlar bildiriblər.

Öz növbəsində, Azərbaycan hakimiyyəti Bakının mərkəzində reydlərin "yerli sakinlərə və turistlərə israrlı cinsi xidmət təklifləri" ilə əlaqədar ictimai asayişin pozulması haqqında çoxsaylı şikayətlərlə bağlı keçirildiyini bildirib.

Eyni zamanda, saxlanılanların əksəriyyəti fahişəlik ittihamlarını təkzib ediblər. Ekspertlərin məruzəsində deyilir ki, bir neçə nəfər xuliqanlıq və polisə müqavimət ittihamı ilə inzibati həbs cəzası çəkib. Zərərçəkmişlərin məhkəməyə müraciət etmək cəhdləri nəticəsiz qalıb. -02D-