BMT-nin İnkişaf Proqramının rəhbəri Azərbaycanda səfərdədir

Birləşmiş Millətlər Təşkilatının İnkişaf Proqramının (BMTİP) rəhbəri Helen

Klarkın Azərbaycana səfəri başlayıb. O,  səfərinin məqsədləri barədə mətbuat qarşısında brifinqlə çıxış etmişdir və BMT-nin İnkişaf Proqramı və Azərbaycan arasında strateji əməkdaşlığın möhkəmləndirilməsinin vacibliyini vurğulamışdır.

Səfərin məqsədi qarşılıqlı maraq doğuran sahələrdə mövcud əməkdaşlığın dərinləşdirilməsi, eləcə də Azərbaycan və BMTİP arasında innovativ tərəfdaşlığın yeni imkanlarının tədqiq edilməsidir. Helen Klark 2-3 oktyabr 2014-cü il tarixlərində keçiriləcək IV Bakı Beynəlxalq Humanitar Forumuna qatılacaq və tədbirin açılış mərasimində çıxış edəcəkdir. O, yüksək səviyyəli hökumət rəsmiləri, qadın siyasətçilər, BMT-nin Azərbaycandakı İdarə Heyəti və ölkədə akreditə olunmuş diplomatik nümayəndəliklərlə görüşəcək.

BMTİP rəhbəri həmçinin Sumqayıt şəhərini də ziyarət etməyi planlaşdırır. O, BMTİP və Norveç hökumətinin birgə layihəsi çərçivəsində yaradılan SYSLAB Mərkəzi və Vətəndaşlara Xidmət və Sosial İnnovasiyalar üzrə Dövlət Agentliyi tərəfindən yaradılan və orta gəlirli eləcə də aşağı gəlirli ölkələrlə bölüşmək üçün unikal bir təcrübəyə malik ASAN Xidmətlə tanış olacaq.

Helen Klark 2009-cu ilin aprel ayında Birləşmiş Millətlər Təşkilatının İnkişaf Proqramının (BMTİP) rəhbəri təyin olunmuşdur və təşkilatın ilk qadın rəhbəridir. O, həmçinin inkişaf məsələləri ilə məşğul olan bütün BMT fond, proqram və departament rəhbərlərinin daxil olduğu Birləşmiş Millətlər Təşkilatı İnkişaf Qrupunun sədridir. BMTİP-dəki fəaliyyətindən öncə, Helen Klark 1999-2008-ci illər ərzində Yeni Zelandiyanın baş naziri vəzifəsində çalışıb. Helen Klark Yeni Zelandiyada baş nazir vəzifəsinə seçilən ilk qadın olmuşdur və bu vəzifəni ən uzun müddət tutan insanlar arasında ilk beşliyə daxildir. Helen Klarkın BMTİP-in rəhbəri vəzifəsində nüfuzunu nəzərə alaraq, Forbes jurnalı onu dünyanın 100 ən nüfuzlu qadınları siyahısına daxil etmiş və “Birləşmiş Millətlər Təşkilatında ən təsirli qadın” adına layiq görmüşdür. -0-