Deputatın köməkçısı: "Məhkəmə Cavanşir Feyziyevin qarşılıqlı iddiasına baxır" (Yenilənib)

Milli Məclisin deputatı Cavanşir Feyziyev əmlakının həbsilə bağlı London məhkəməsinin qərarının şərhinə dair Turan agentliyinin sorğusuna cavab olaraq  onun köməkçısı Turan Salamov bunları deyib: “Məhkəmənin müsadirə ilə bağlı hələ hər hansı qərarı yoxdur. "Hazırda məhkəmədə Cavanşir Feyziyevin qaldırdığım iddiasına baxılır".

Xatırladaq ki, ötən gün OCCRP (Korrupsiya və Mütəşəkkil Cinayətkarlığın Araşdırılması Mərkəzi) London Ali Məhkəməsinin Cavanşir Feyziyevin və onun qohumlarının 39,5 milyon funt sterlinqdən (50 milyon ABŞ dolları) çox əmlakına həbs qoyması barədə məlumat yayıb.

* * *

Böyük Britaniya azərbaycanlı deputatın 39 milyon funt sterlinqlik əmlakını dondurub

Cümə axşamı London Ali Məhkəməsi azərbaycanlı deputat Cavanşir Feyziyevə və onun xanımına məxsus 22 daşınmaz əmlaka həbs qoyub.

OCCRP-in (Korrupsiya və mütəşəkkil cinayətkarlığı Araşdırma Mərkəzi) dərc etdiyi sənədlərə görə, 39,5 milyon funt sterlinqdən (50 milyon ABŞ dolları) çox əmlak 2023-cü ilin iyun ayında dondurulub. Bütün bu müddətdə Feyziyev Londonda daşınmaz əmlakın alınması üçün vəsaitin qanuniliyi barədə sorğulara cavab verməyib.

Ailənin vəkili əmlakın qanuni yolla əldə edildiyini iddia edərək hakim Naycela Pulu  əmlaka həbs qoyulması qərarını ləğv etməyə razı salmağa çalışıb.

Qeyd edək ki, bundan əvvəl Feyziyevin ailəsi Böyük Britaniyanın Cinayətkarlıqla Mübarizə üzrə Milli Agentliyinin (NCA) sanksiyalarına məruz qalıb. Britaniya hakimiyyəti hesab edib ki, Feyziyevin və onun ailə üzvlərinin bank hesablarındakı milyonlarla funt sterlinq "2017-ci ildə OCCRP-nin açıqladığı və "Azərbaycan camaşırxanası" kimi tanınan beynəlxalq çirkli pulların yuyulması sxemindən gəlir.

2022-ci ildə Böyük Britaniya həmin vəsaitdən 5,6 milyon funt sterlinqi (7,56 milyon ABŞ dolları) Feyziyevin xanımı, böyük oğlu Orxanın və qardaşı oğlu Elman Cavanşirin hesablarından müsadirə edib.

Feyziyevin və xanımının daşınmaz əmlakının dondurulması barədə qərar   çirkli pulların yuyulması yolu ilə əldə edildiklərinə dair "ciddi sübutlar" səbəbindən onları satmağa və ya kiməsə verməyə yol vermir.

Dondurulmuş əmlaklar arasında ən bahalı əmlak eksklüziv Chelsea Barracks kompleksində dəyəri 26 milyon funt sterlinqdən  (33,4 milyon dollar) çox olan iki rezidensiyadır.  Feyziyev onları 2020-ci ildə alıb. Hələ o vaxtlar Britaniya hakimiyyəti çirkli pulların yuyulması faktlarını araşdırırdı.

Dondurulmuş digər əmlaklar arasında Ricents- parka mənzərəsi olan mənzil, həmçinin Londonun şimal-qərbindəki yaşayış kompleksində 19 mənzil var. Feyziyev bu əmlakı 2008-2018-ci illərdə 10  milyon funt sterlinqdən (13,7 milyon dollar) çox qiymətə alıb.

NCA-nın məlumatına görə, ümumilikdə dondurulmuş əmlak 50 milyon funt sterlinqdən (63 milyon ABŞ dolları) çox qiymətləndirilir.

Feyziyev parlamentlərarası əlaqələr üzrə Azərbaycan-Britaniya işçi qrupuna rəhbərlik edib və 2022-ci ilə qədər Avropa İttifaqı- Azərbaycan parlament əməkdaşlıq Komitəsinin həmsədri olub. Britaniya məhkəməsi onun qohumlarına məxsus 5,6 milyon funt sterlinqdən çox vəsaiti müsadirə etdikdən bir neçə ay sonra o bu vəzifələrdən kənarlaşıb.

Vəkilin mətbuata verdiyi açıqlamaya görə, ailə əmlakın müsadirə edilməsindən məyus olub, lakin NCA-nın tələb etdiyi kimi, 15,4 milyon funt sterlinqin yox,  5,6  milyon funt sterlinqin  götürülməsindən “razı qalıb”.

2017-ci ildə OCCRP-nin "Azərbaycan landromatı" adlı araşdırması Böyük Britaniyada qeydiyyatdan keçmiş dörd saxta şirkət vasitəsilə ölkədən çıxarılan təxminən 2,9 milyard dollarlıq mürəkkəb yuyulma sxemini ortaya qoyub.

Turan agentliyi London məhkəməsinin dünənki qərarı ilə bağlı şərh verməsi xahişilə Cavanşir Feyziyevin köməkçisinə sorğu göndərib. Agentlik deputatın və ya onun qanuni nümayəndəsinin fikrini dərc etməyə hazırdır.