BŞİH-də qişa hazırlıq müşavirəsi

Bakı/29.11.18/Turan: Bakı Şəhər İcra Hakimiyyətində payız-qış mövsümünə hazırlığın yekunu ilə bağlı müşavirə keçirilib. Müşavirədə Bakının rayonlarının icra hakimiyyətləri başçıları, əlaqəli qurumların rəhbərləri iştirak ediblər.

BŞİH-dən Turan-a verilən məlumata görə, müşavirədə bildirilib ki, qışa hazırlıqla əlaqədar xüsusi qərargah yaradılıb. Qeyd edilib ki, "Azəriqaz","Azərişıq", "Azərsu", Bakı Su kanalı İdarəsi və digər qurumlarda da qışa hazırlıq çərçivəsində tədbirlər planları hazırlanıb. Əlaqəli qurumların rəhbərlərinə qışda hər hansı ciddi hal yaranarsa, onun dərhal aradan qaldırılması məqsədi ilə operativ tədbirlərin görülməsi ilə bağlı tapşırıqlar da verilib.

Müşavirədə yaşayış binalarının lift təsərrüfatlarının durumunun xüsusi müzakirə olunduğu bildirilir. Məlumat verilib ki, paytaxtın lift təsərrüfatının yenilənməsi ilə bağlı yeni layihə hazırlanıb, maliyyə vəsaiti ayrılıb. Yeniləmə tədbirlərinin fevral-mart aylarında reallaşacağə bildirilir.-0--