BŞİH qərarını dəyişdi (YENİLƏNİB)

Bakı Şəhər İcra Hakimiyyəti (BŞİH) öz qərarını dəyişirək ReAl və Müsavat partiyaların, D18 Hərəkatın və iki müstəqil namizədin parlament seçkiləri zamanı saxtakarlıqlara qarşı mitinqini razılaşdırdı. 

Bu barədə AzadlıqRadiosuna məlumat verən D18 Hərəkatın başqanı Ruslan İzzətlinin sözlərinə görə, səhər mitinq müraciətinə mənfi cavab verən qurum onu bu gün, fevralın 12-də BŞİH-ə ikinci dəfə dəvət edərək başqa bir qərar təqdim etdi. "BŞİH-nin ictimai-siyasi və humanitar şöbəsinin rəhbəri Elmin İmanov mənə müraciətimizə cavab təqdim etdi. Cavabda qeyd olunur ki, 28 may metrosunun önündə meydanda yox, Lökbatanda 28 May küçəsi, "Neftçi" İdman Klubunun Qaradağ təlim idman bazasında fevralın 16-da saat 15:00-dan 17:00-dək keçirilməsinə razılıq verilib".

*   *   *

2020 Fevral 12 (Çərşənbə) 19:10:46

Paytaxt meriyası deputatlığa namizədlərin mitinq keçirməsinə icazə verməyib

Bakı/12.02.20/Turan: Bakı meriyası Müsavat, REAL partiyaları, D18 təşkilatı və deputatlığa müstəqil namizədlərin fevralın 16-da mitinq keçirməklə bağlı müraciətinə mənfi cavab verib.

Meriya imtinanı heç bir şeylə əsaslandırmayıb. Bu barədə mitinqin təşəbbüsçülərindən biri, deputatlığa müstəqil namizəd Ruslan İzzətli bildirib.

Turan-ın təşkilatçıların icazəsiz mitinqə gedib-getməyəcəyi ilə bağlı sualının cavabında o deyib ki, bu barədə qərar meriyaya müraciəti imzalayan hər kəs ilə müzakirədən sonra qəbul ediləcək.

Xatırladaq ki, parlament seçkilərinin nəticələrinin saxtalaşdırılmasına etiraz olaraq “28 may” metro stansiyasının qarşısındakı meydanda mitinq planlaşdırılırdı.16D-