Bunların həbsinin əsl səbəbi korrupsiya deyil – Bəxtiyar Hacıyev

Bakı/27.04.21/Turan: Aprelin 27-də Prezident İlham Əliyevin sərəncamı ilə Şəmkir İcra Hakimiyyətinin başçısı Alimpaşa Məmmədov vəzifədən azad edilib.

Dünən isə onun hüquq-mühafizə orqanlarının tərəfindən həbs olunduğu bildirilirdi.

Bundan əvvəl də bir neçə rayonun icra başçıları həbs olunub. Onlara qarşı irəli sürülmüş ittihamların arasında rüşvətxorluq və vəzifədən sui-istifadə etmə də var. Son günlər isə eyni ittihamlarla müxtəlif xəstəxanaların baş həkimlərin həbsləri də aparılır.

Bəzi ekspertlər isə hesab edir ki, problem kadrlarda deyil, sistemdədir. Bu həqiqətənmi belədir? Həbs olunmuş məmurların yerinə təyin olunmuş şəxslər necə işləyir? Dövlət büdcəsi təyinatı üzrə xərclənirmi?

Ötən ilin mayın 1-də Prezident İlham Əliyev Baş prokuror Kamran Əliyevi qəbul edərkən bildirib ki, korrupsiyaya və rüşvətxorluğa qarşı Azərbaycanda çox ciddi mübarizə aparılır. «Mən bu məsələ ilə bağlı dəfələrlə öz fikirlərimi bildirmişdim. Bütün dövlət məmurlarını xəbərdar etmişdim və hətta demişdim ki, əgər hansısa dövlət məmuru öz işində düzəlişlər edə bilmirsə, yaxud da ki, istəmirsə, qoy özü könüllü şəkildə dövlət işindən istefa versin. Amma əfsuslar ki, mənim sözlərim bəziləri üçün dərs olmadı və bunun nəticəsində indi Dövlət Təhlükəsizliyi Xidməti bir neçə əməliyyat keçirərək rüşvətxorları, yüksək vəzifə sahiblərini ifşa etdi və onlar artıq cinayət məsuliyyətinə cəlb edilmişlər».

Dövlət başçısı qeyd edib ki, icra başçıları həbs olunan rayonlarında işlər geniş təhlil edilməlidir. 

Milli Məclisin Hüquq Siyasəti və Dövlət Quruculuğu komitəsinin üzvü Fəzail Ağamalı Turana bildirib ki, baş vermiş korrupsiya hallarını indiki zamanında sistemin üzərinə qoymaq doğru olmazdı. «Vaxtilə korrupsiya və rüşvətxorluğa imkan yaradan və bu baxımından problemli olan həmin sistem demontaj edilir. Ölkə Prezidentinin 2018-ci ildən start verdiyi islahatlar, eyni zamanda bunun içərisində yer alan korrupsiya və rüşvətxorluğa qarşı mübarizə davamlı xarakter daşıyır».

Deputat qeyd edib ki, 2019-cu ildən başlayaraq ölkədə korrupsiya və rüşvətxorluğu yox edilməsi üçün ölkə Prezidentinin iradəsi ortalıqdadır. «O açıq şəkildə bəyan edib ki, Azərbaycan dövləti rüşvətxorluğa və korrupsiyaya qarşı müharibə elan edib. Bu müharibə bu gün də davam edir və bunun kökü kəsilənə qədər də davam edəcək».

Komitə üzvü baş vermiş olan ciddi dəyişikliklər və korrupsiya və rüşvətxorluğa qarşı açıq xarakter daşıyan mübarizə bir sıra məmurları yenə də özünün köhnə əməllərindən imtina etməyə vadar etmədiyindən təəssüf etdiyini deyib. «Həmin insanlar bundan nəticə çıxarmır və köhnə qayda ilə öz fəaliyyətlərini davam etdirirlər. Buna görə də son vaxtlar həm insanlarımızın sağlamlığı üzərində pul qazanıb varlanmaq niyyəti güdən bir sıra həkimlər, hansılar ki, digər həkimlərin fədakar əməyinə kölgə salmağa cəhd göstərirlər, eyni zamanda digər sahələrdə korrupsiya və rüşvətxorluğa yol verdiklərinə görə barələrində cinayət işləri açılan adamlar cəzalandırılır. Bu, başlanmış və davam etməkdə olan korrupsiya və rüşvətxorluğa qarşı mübarizənin davamlı olduğunu bir daha sübut edir».

İctimai fəal Bəxtiyar Hacıyev isə AzadlıqRadiosuna bildirib ki, adətən vəzifəli şəxslərin həbsini korrupsiya ilə mübarizə aparılması ilə əlaqələndirilir. «Amma orta statistik Azərbaycan vətəndaşına da bəllidir ki, bunların həbsinin əsl səbəbi korrupsiya deyil. Korrupsiyaya qalsa, onda gərək Azərbaycan məmurların əksəriyyəti hazırda həbsdə olardı».

Ekspert hesab edir ki, adətən belə hallarda hansısa başqa siyasi məqamlar olur. «Yəni o şəxslərin təqdimatını vermiş biri hansısa məmurların vurulmasına çalışır və sair. Sadəcə sonra bunu korrupsiya ilə mübarizə kimi təqdim edirlər».

Fəal hesab edir ki, Azərbaycan beynəlxalq təşkilatlarına öz üzərinə götürdüyü öhdəliklərini icra etdiyini göstərməlidir. «Buna görə də il ərzində sadəcə olaraq hansısa siyasi vurulmuş kadrları korrupsiya ilə mübarizə adı ilə həbs edirlər və bununla da sanki Azərbaycanda korrupsiya ilə mübarizənin həyata keçdiyini göstərirlər».

B.Hacıyevin fikrincə, Azərbaycanda bir neçə nəfəri çıxmaq şərtilə demək olar ki, korrupsiyaya bulaşmamış məmur yoxdur. «Bunların hamısı sistemin adamlarıdır. Həmin adamlar şəffaf siyasi sistemdə ya şəffaf çalışıb ölkənin inkişafına fayda verirlər və yaxud da öz potensiallarını olmadığını, maaşın az olduğunu görüb həmin sistemdən uzaqlaşırlar. Amma Azərbaycanda sistem özü korrupsiyaya bulaşdığına görə vəzifəyə təyin olunmuş və həmin vəzifədə uzun müddət qalanlar həmin sistemin parçası olurlar».

Fəal vurğulayıb ki, ona görə də kadrların dəyişməsi, kiminsə həbs olunması sistemin mahiyyətini heç bir halda dəyişmir. «Sistem özü köklü halda, yuxarıdan aşağıya doğru dəyişməsə heç bir tədbirin faydası olmayacaq».—06D-