Cəmil Həsənli MSK-dan prezidentliyə namizədlərin gəlirlərinin və əmlakının açıqlanmasını tələb edir

“Təkrar müraciət edərək, xahiş edirəm ki, 9 oktyabrda keçiriləcək prezident seçkilərində qeydə alınmış prezidentliyə namizədlərin gəlirlərinin miqdarı və mənbələri, mülkiyyət hüququ əsasında namizədlərə məxsus əmlak barədə məlumatların KİV-də dərcini təmin edəsiniz və prezidentliyə namizədlərin gəlirlərinin miqdarı və mənbələri, mülkiyyət hüququ əsasında namizədlərə məxsus əmlak barədə Mərkəzi Seçki Komissiyasına təqdim etdikləri sənədlərin surətlərini mənə təqdim etməyinizi xahiş edirəm”. Bu barədə Milli Şuranın prezidentliyə vahid namizədi Cəmil Həsənli Mərkəzi Seçki Komissiyasına göndərdiyi müraciətdə deyilir. 

Cəmil Həsənlinin mətbuat xidmətinin məlumatına görə, bundan öncə Cəmil Həsənli Mərkəzi Seçki Komissiyasına müraciət edərək prezidentliyə namizədlərin gəlirləri və onlara məxsus əmlakları barədə məlumatların dərc olunmasını və surətinin ona təqdim olunmasını xahiş edib. 

Lakin MSK həmin məlumatları dərc etməkdən və Milli Şuranın namizədinə təqdim etməkdən imtina edib. Bununla bağlı prezidentliyə namizəd Cəmil Həsənli yenidən MSK- ya müraciət edib. -03D-